EDITORYAL - Ang paglubong ni Marcos

Hangtod karon gikagubtan gihapon ang patay’ng lawas ni kanhi Presidente Ferdinand Marcos kay di gusto sa kadaghanan nga ikalubong sa Libingan ng mga Bayani.

Sa pagtuo sa kadaghanan nga ang anaa sa maong lubnganan pulos mga tawo nga way kasalanan ug kumo kay si Marcos nabaniog man kaayo nga makasasala, di nila gusto nga itipon sa mga way sala.

Sa panahon ni Cristo may mga tawo nga misugyot Kaniya nga pasilotan ang usa ka babaye nga ilang gitawag nga makasasala kaayo.

Unya gisugo sila ni Cristo nga kung si kinsa kanila ang way sala maoy mobato sa babaye aron mamatay. Apan ang usa’g-usa nga kihante nahilom og kalit kay pagsil-ing nila sa ilang kaugalingon makasasala usab diay sila.

Ang kadaghanan nagtuo man gud nga ang paghukom sa tawong makasasala nia ra sa hukmanan sa yuta, ug wa sila masayud nga ang mohatag og final judgement mao ang Dios unya sa adlaw sa paghukom.

Apan angay timan-an nga pag-abot sa judgement day o sa pagbalik ni Cristo, duha ray padulngan sa mga tawong patay ug buhi nga iyang hiabtan nga mao ang langit alang sa iyang mga pinili nga napasaylo sa mga sala ug impiyerno alang niadtong di niya pinili nga wa mapasaylo sa mga sala.

Busa may ulitawong datu nga nangutana kang Cristo kaniadto unsaon niya nga mahalangit sa judgement day, gitubag siya ni Cristo nga” Kun buotan ka sukad sa imong pagkabata ibaligya ang imong katigayonan ug ihatag sa mga kabus ang halin”.

Nahiubos ang ulitawo ug milakaw ug nakaingon si Cristo”mas makasulod pa sa lungag sa dagom ang usa ka camel kay sa tawong dato sa gingharian sa langit”.

Busa alang sa gustong mahalangit si Cristo miingon “Ako mao ang ganghaan ug ang mosulod kanako pinaagi sa akong lawas, maluwas sa akong pagbalik”

Apan ang pagpangita sa iyang lawas trabahounon ug nagkinahanglan og sakripisyo sa usa ka tawong buhi kay kun patay na wala na siyay mahimo. Ambot si Marcos misuway ba kaha to sa pagpangita sa lawas ni Cristo sa buhi pa siya. Di kaha ka mapareha ra kang Marcos?    Di    ba?