Ang kaibog

Usa ka higayon niana, usa ka tiguwang ang miduol kanako og nangonsulta: “Padre, sa akong pangedaron nga 70 maibog man ko gihapon og guwapa! Nakasala ko Padre?” Daw sa nahimut-okan siya sa akong katawa. Ako siyang giingnan: Wala ka makasala iyo! Maibog man gani ko ikaw pa.

Ang kaibog ingon nga usa ka pwersa ang nagtukmod sa usa ka tawo nga iyang hangupon ang si bisan kinsa ug ang bisan unsa nga giisip niyang makatagbaw sa iyang galamhan. (mata, ilong, dila, panit, dunggan, dila). Ang maong katagbawan sa mga galamhan ang nagdapit sa maong tawo aron iyang igahin ang bahin o dili ba kaha ang kinatibuk-an sa iyang panahon aron lamang sination ang katagbawan nga gidalit ning maong reyalidad nga nakahatag niya og usa ka makabuhing duso sa iyang inadlaw’ng pagkinabuhi. Dili dautan ang pagkaibog kun ang maong kusog o duso aron mamahimong mas magilawon ang panlantaw sa kinabuhi. Apan ang matang sa kaibog nga magdala na hinuon sa dili han-ay nga pagbati ang nakanudnod sa usa ka tawo diha sa pagpakasala.