Kamong mga drayber, ilabi na sa mga magmaneho’g motorsiklo, tumana lagi g’yud ninyo ang balaud aron nga dili kamo madakpan.
Sa kinalit nga operation sa Land Transportation Office (LTO) Task Force Alpha didto sa Jagobiao, Mandaue niadtong miaging hapon, pwerteng daghana nga mga drayber ang nadakpan.
Mangyawat ang mga PUJ driver sa pagkarga og daghan nga subra sa ilang gitugot nga passenger capacity aron makakolekta og daku apan kun masakpan, alkanse na g’yud hinoon.
Dihang miadto ko sa Talisay kagahapon sa buntag kay gipa-renew nako ang rehestro sa akong sakyanan, daghanang mga drayber og motorsiklo nga maisip nimo nga abusado kay walay helmet ug ang ilang motor walay side mirrors.
Ingon usab niini ang sitwasyon didto sa Jagobiao. Sayonan mo sa multa kun masakpan kamo nga wala mag-helmet? P1,778 ang inyong bayranan usa ninyo makuha pagbalik ang inyong driver’s license.
Kun walay side mirrors ang inyong motor, kapin sa P1,300 ang multahan. Kun magpakumbayot kamo’g pasahero (hitching) kapin sa P1,200 ang multahan. Mao nga ayaw na tawon kamo pag-abuso.
Ang uban gud magsalig ra nga dili manakop ang mga polis sa ilang dapit, ug gani mao pa ang mag-una-una og himo’g kalapasan ang uban. Kun mahitabo nga ang LTO mohimo’g operation sa inyong dapit sigurado g’yud mo nga madakpan.
Ang maayo mao nga motuman na lang g’yud ta sa lagda. Ako gani, bisan ari lang duol sa among balay, basta mo-drive na ko og motor mag-helmet g’yud ko kay dili maayo nga supakon nato ang balaud.
Kamong mga hepe sa kapolisan sa lainlaing police stations mas maayo tingali nga estriktohon ninyo ang inyong mga sakop nga motuman gayud sa lagda. Ang uban pa diha nga motor, ang plate numbers anaa gibutang sa kilid.
Kun ako ang makasakop niini dili gayud ko makapasaylo. Kun makaaksidente gud kining maong mga motor unya mosibat, bisan pa og dunay makakita walay makatug-an sa plate numbers kay dili man dayon makita.
Tumanon lang gud nato ang balaud kay wala g’yuy modakop ninyo.
* * *
Gikan mi sa Jagobiao, Mandaue, pag-agi nako sa taytayan sa Mahiga diha sa barangay Banilad kaniadtong miaging hapon, akong gitan-aw ang sapa sa ubos. Pastilan, dakua g’yud diay sa lugar sa sapa nga gilapas sa tag-iya sa dakung balay-patigayon diha uy.
Ang sapa gud nahimo na nga hiwi bisan og tul-id unta kadto sa una. Aw klaro man kaayo nga makita. Bisan si Mayor Michael Rama nakakita niini dihang gisuroy namo ang Mahiga Creek ug mao unta kini ang angay nga tagdon sa dakbayan.
Kinahanglang himoan na unta og lakang sa City Hall aron pagpakita ngadto sa mga kabus nga patas ang pagpatuman sa syudad sa pag-clear sa mga illegal structure sa kasapaan.
* * *
Hapit na ang pagbukas sa klase. Maayo unta kun walay mga magtutudlo nga mopugos pagkolekta og amotan sa mga bata ug sa ilang mga ginikanan.
Kun mahitabo nga makabantay kamo og mga maestra nga dili motuman sa lagda nga gilatid kanila sa kadagkoan sa Department of Education, itug-an ninyo sa media.
Dili lang hinuon nako ibutang ang akong numero dinhi kay samtang dunay uban nga mga tarung og pangisip, dili nimo kalikayan nga duna g’yuy uban nga mga lahi.