Duha ka higayon na nga nagtigom ang Regional Tripartite Wages and Productivity Board dinhi sa Central Visayas aron unta hisgutan duna na bay “supervening condition” aron ilang tukion ang duha ka mga nag-ung-ong nga petisyon alang sa umento sa suholan sa mga mamumuo dinhi sa rehiyon.
Sa duha ka higayon nilang panagtagbo pulos nabawo ang mga trabahante tungod kay hangtud ron wala gyud masulbad ang ilang lalis. Ang mga membro sa RTWPB-7 nagtabla sa ilang botasyon pagdeklarar og supervening condition.
Ang supervening condition gikinahanglan ni aron makasugod pagtuki ang wage board sa mga petisyon alang sa usbaw sa suholan tungod kay wa pa may usa ka tuig sikad katapusan silang mipagawas og wage order.
Ubos man gud sa balaud dili mahimong mohatag og laing umento sa suholan ang wage board kun dili pa molabay ang usa ka tuig sukad sa katapusang paghatag og umento.
Sama sa naandan, nagpabiling babag sa pagkab-ot sa gikahinamang usbaw sa suholan sa mga mamumuo ang duha ka mga representante sa gobyerno diha sa RTWPB. Ang National Economic Development Authority kon NEDA ug ang Department of Trade and Industry maoy mga kontrabida sa labor sector sukad kaniadto hangtud karon.
Sa nanglabay’ng mga tigom sa wage board si DTI regional director Asteria Caberte nangugat nga way supervening condition tungod kay wa kunoy pagsaka sa presyo sa mga nag-unang palaliton.
Apan sa labing awahing public consultation nga ilang gihimo diin ang mga ahensiya sa gobyerno mihatag og economic situationer ang ahensiya mismo ni Caberte miangkon sa pagsaka sa presyo sa mga prime commodities basi sa ilang weekly price monitoring.
Sigun pa sa pagmonitor sa DTI misaka ang mga presyo sa delata, harina, noodles, bugas ug uban pa. Gani mismong ang amo ni Caberte nga si Trade Secretary Gregory Domingo niangkon ug nangayo og pasaylo sa publiko sa ilang kapakyas pagbadlong sa pagsulbong sa presyo.
Pila may gibayad sa mga negosyante kang Caberte aron molingiw sa kamatuoran nga labihan nang pagsaka sa presyo sa mga palaliton ug nga gikinahanglan na kaayo sa mga mamumuo ang dyutay’ng umento sa ilang suholan?
O nagmika lang gyud siya sa iyang katungdanan nga wala siya masayod sa pagsaka sa presyo sa mga palaliton? Kun ang pagbantay sa presyo dili mahimo ni Caberte, unsa na kaha ang pagbantay sa kalidad sa mga produkto diha sa kamerkadohan aron kaprotehian ang katungod sa mga konsumidor?
Ang gipakitang baruganan ni Caberte diha sa RTWPB maoy tubag sa daghang mga pangutana nganong daghan sa mga substandard ug peligro nga mga produkto ang nakalusot sa kamerkadohan.
* * *