EDITORYAL - Ang tabang ni Cutie ug Tommy

Dalaygon kaayo ang mga lakang nila ni Kongresista Cutie dela Mar ug Tom Osmeña sa pagpahat nila gikan sa pundo sa ilang mga pork barrel ngadto sa mga pamilyang gipapahawa gikan sa Mahiga creek.

Samtang ang kuwarta sa City Hall kinahanglang magamit alang sa maayong katuyoan , ug di angayang gamiton aron ang tawo labing makakat-on sa pagpabug-at sa gobyerno.

Ang pagpuyo sa yuta sa gobyerno , usa ka matang sa paghasol sa tawo ngadto sa gobyerno, labi na gyud kun inigpapahawa mangayo ka pa og bayad ug relocation site.

Ang tanan di man tingale makalimot sa giingon ni anhing Presidente John F. Kennedy sa Amerika nga “ayaw pangutan-a ang gobyerno kun unsay mabuhat niini kanimo, apan pangutan-a ang imong kaugalingon unsay mabuhat nimo ngadto sa gobyerno”.

Mao bitaw tong pagkabaniog sa giingong may usa ka dakong piging nga gigahinan sa City Hall og tag P1,000 nga pagkaon ang matag usa nga motambong, daghang nahaigking kay tiaw mo bay, P1,000 nga balor sa pagkaon ihansak sa tawo sa iyang lawas, asa pa man intawon na niya ibutang.

Kay kita gong mga kabus, mokaon ka og kan-on suwaan og utan ug piniritong isda, busog kana ug halos ang P50 bastante na kaayo, kun mokaon ka og bali og P100 sa kinabos nga pagkaon  butirik ka na kaayo, mokaon ka og P200 aw maglisud ka na pagbarog gikan sa imong gikan-an gumikan sa kabusog, unsa na kaha kun P1,000 di kaha ka moligid sa kabosding?

Busa usa to ka dakong sayop nga   di angayang usbon pa paghimo ni Mayor Rama.

Pero kun mogasto ka nga mura tinuod og mitabang ka, unya labing moedukar sa katawhan aron mopabug-at sa gobyerno, maayo kini sa mga politiko kay nagtuo man silang makapuntos sila kay daghang mobilib sa ilang gihimo.

Apan ang mga tawong maayo og pinsada, nasayud nga ang pagbuhat sa ingon maoy pagtudlo sa tawo aron mopakamang sa gobyerno. Di   ba?