Pagpamalandong alang sa Malangkubong Kaayohan - Mga nagkadaiyang matang sa kahadlok

Gawas sa mga phobias (gikan sa Griyegong Pulong sa PHOBOS nga nagpasabot og kalisang) adunay laing mga matang sa kahadlok ug kini naglangkob ning mosunod:

A.) KAHADLOK SA WALA HIBAW-I – Ang mga sanglitanan niini mao ang usa ka bag-ohay lang nigradwar nga wala masayod sa iyang kaugmaon human sa gradwasyon, ang kamatayon nga taliabot ug uban pang mga hitabo nga dunay kalambigitan sa kawalay kasegurohan. Nahadlok kita kay wala man kita masayod. Usa gyud na ka natural nga pagbati ni bisan kinsa nga mahadlok gyud sa giisip niyang unknown. Niadtong Chaplin Intern pa ko sa Cebu Doctor’s Hospital, usa sa mga malisud nga lakang ang pagsulod sa mga pribadong lawak sa pasyente. Mao tingali nga daghan kanamo ang mas moayon nga moadto sa wards. Kini tungod kay sa layo pa lang imo namang maklaro kun andam ba ang pasyente o dili nga makigkukabildo kanimo. Samtang didto sa sulod sa lawak nga pribado, dili nimo maklaro ang estado sa pasyente nga kun imong sudlon basin makasinati ka na hinuon sa gitawag nila’g rejection. Mao nga usa sa mga kinahanglanon mao gyud ang pagtuo ingon man ang pagrisgo. Pagtuo nga bisan pa man sa mga higayon nga dili ikaw seguro anaa gihapon ang kahulogan sa kinabuhi. Pagrisgo nga bisan pa man kun ikaw ibalewala anaa gihapon ang kahulogan sa kinabuhi.