Mayor sa midnorth area sa Sugbo smuggler?

Usa ka kasaligang tinubdan o tawgon ta lang nga duwende ang mihunghong kanako nga ang mayor sa usa sa mga lungsod sa midnorth area sa lalawigan sa Sugbo nga si Mayor D.A.D smuggler. Ang initial lamang usa sa iyang pangalan ang atong ihatag, dili lamang usa nako ibutyag ang iyang tinood nga pangalan tungod kay hangtod karon wa pa gihapon siya motubag sa akong mga text ug tawag.

Ako dili basta-basta nga motoo sa kasayoran nga akong nahibaw-an tungod kay mayor baya ang gipasanginlan nga smuggler pero ang mihunghong kanakong duwende kasaligan ug nakahibawo gayod sa kalihokan sa mayor, gani ang pipila sa maong kasayoran iya pa kining giditalye kanako.

Matud pa sa akong kasaligang tinubdan nga si Mayor D.A.D usa ra kini ka empleyado sa forwarding company kaniadto unya nahimong haoshiao nga customs facilitator. Haoshiao tungod kay matud pa sa akong tinubdan si D.A.D dili license customs broker. Si D.A.D gigamit sa mga smuggler ug mga buaya nga opisyal sa Customs sa Cagayan sa pagpalusot sa mga kontrabando.

Dugang pa sa duwende nga mihunghong kanako nga si D.A.D. naabot didto sa Cagayan tungod sa usa ka Sugboanon nga nahimong Customs collector didto sa Cagayan. Ang maong Customs collector nga anak sa tag-iya sa iladong mamohatay og gitara sa dakbayan sa Lapu-lapu ang nagdala ni D.A.D didto sa Cagayan.

Ang akong kasaligang tinubdan miingon nga sa wa pa mahimong Mayor si D.A.D. trabaho niini ang pagpalusot sa mga kontrabando didto sa Cagayan hinungdan nga kini namilyonaryo ug nahimo pa gyod kunong mayor ang kanahan.

Napadpad si D.A.D. didto sa Cagayan kay ang mga Sugboanong smuggler mibalhin sa ilang operasyon didto sa Cagayan tungod sa kahigpit sa pagbantay sa mga Customs officials sa Port of Cebu.

Tungod kay dili basta-basta ang maong pasangil batok ni Mayor D.A.D. ato siyang gisuwayan sa pagkuha sa iyang habig sulod sa tulo ka higayon ug ang ulahing higayon niini mao sa akong tulumanon nga SAKSI EVENING EDITION sa DySS Super Radyo kaniadtong Martes sa gabii pero iya gihapong giserado ang iyang linya para sa iyang reaction. Apan sa gihapon bukas ang atong linya para sa iyang habig kun makahuna-huna na siya sa pagtubag sa pasangil batok kaniya. Mayor smuggler ka? Tubag!