Mireklamo kono ang mga magbabalaud gumikan sa kalangan sa pag-release sa ilang pork barrel. Sa ato pa, mahinungdanon kaayo ang pork barrel kay sa pagpanday og mga balaud.
Si Federico Pascual sa Philippine Star mipahinumdom sa halangdon natong mga magbabalaud sa ilang mga katungdanan: “Somebody should remind senators and congressmen that their job is lawmaking, not working on contracts and overseeing public works. This is an Executive function.
“Estimates have placed at an average of 30 percent the slice that graft-oriented legislators bite off their pork as they dictate projects and pick favored contractors.”
Nga duna unta konoy magpahinumdom sa mga senador ug kongresista nga ang ilang katungdanan mao ang pagpanday og mga balaud, dili ang pagpapirma og mga kontrata ug pagpahigayon og mga public works projects. Katungdanan kini sa Executive department.
Unya, mga 30 porsiyento kono sa salapi sa lungsod ginganlan og pork barrel ang makaon o kumbirahan sa mga “graft-oriented” nga mga magbabalaud. Ngiga no, kun tinuod man! Of course, duna say dili graft-oriented nga mga magbabalaud. Kinsa man ni sila?
Ang matag 24 ka senador adunay P200 million nga pork ug ang kapin sa 250 ka kongresista adunay P70 milyones matag usa kanila, matag tuig. Kamo na lay multiply niini. Inyong makita nga daghan kaayog kwarta ang atong nasud. Kini sa pork barrel lang.
Nangutana si Pascual nga kun maka-give up si Senador Ping Lacson sa iyang pork, nganong dili man kini mahimo sa ubang mga senador ug kongresista, aron ang salapi idiritso og hapak sa bisan unsa mga proyekto, sama sa pagtukod og mga hospital, kadalanan ug mga classrooms.
Si Naoto Kan, Prime Minister sa Japan, gumikan sa krisis nga mihapak sa ilang nasud, wala na modawat og sweldo balig $20,000 matag bulan. Kini, hangtud molabay ang krisis. Ingon man, ang presidente ug ubang opisyales sa TEPCO (Tokyo Electric Power Company), ang operator sa mga nuclear plant nga mibuto, mi-hold usab sa ilang mga sweldo hangtud nga maulian ang Japan sa ila karong kahimtang.
Similarly, samtang wala kita linoga ug wala tsunamiha, apan ang atong nasud dugay nang nag-krisis. Nangutana si Pascual, kon dili ba kono maka-give up sa ilang pork barrel, temporarily, ang halangdon natong mga magbabalaud, aron ang salapi magamit sa mga anti-poverty ug anti-kagutom program sa atong gobyerno. Aron sad maka-concentrate na sila pagpanday og mga balaud. Mahimo kaha ni nato dinhi sa atong nasud?
Kining tanan, wishful thinking ra gyud ni. Kay alang sa atong mga magbabalaud, ang pork ilang lifeline, nga kun mawala kini gikan kanila, mag-unsa man sila? Dili na sila maka-serve sa ilang mga constituents, ug dili na makapanday og mga balaud.
Pastilan!