Misteryo ni Joavan

Sa dili pa, mo-congratulate ko sa Cebu News Workers’ Multi-Purpose Cooperative kang kansang mga miyembro sa Board of Directors ug mga opisyal, nanumpa sa katungdanan atubangan kang Cooperative Development Authority executive director Orlando Ravanera atol sa general assembly sa Victo kagahapon sa Radisson Blu.

Uban ko sa nanumpa sa katungdanan isip director sa Board, uban sa chairman nga si Elias Baquero, vice chairman nga si Marlina Angbetic-Tan, mga kauban nako sa Board nga sila si Flor Perolina, Joseph Tubilan, Oscar Penida, Chester Abadilla ug Lucky Malicay. Kauban usab namo sa Board silang Sam Costanilla, Michelle So ug Jed Calomarde apan wala katunga sa oathtaking.

Nanumpa usab ang mga chairman sa mga komitiba sama nila ni Debbie Duraliza sa election committee ug Emmy Lucena sa audit committee. Apil usab ang mga sakop sa komitiba sama nila ni Jovy Taghoy-Gerodias, Ebeth Yap ug Flora Mata.

Didto usab ang among general manager sa Newscoop nga si Mely Verano, akong classmate sa Master in Public Administration. Mismo si director Ravanera nakadayeg sa Newscoop tungod kay matud niya unang higayon siyang nakadungog nga ang mga sakop sa media naghugpong og kooperatiba.

Congratulations, Newscoop!

* * *

Unsa man gyuy tuyo ni Mayor Socrates Fernandez sa iyang pagpadayon sa iyang pagtapion sa iyang sinagop nga si Joavan Fernandez nga bisan sa kadaghan na niining kasaypanan nga nahimo, wala gyud kini mohunong.

Nagduda ko nga adunay laing motibo si Brod Soc. Pasayloa ko nga migimok lang ang madudahon nakong hunahuna, kay tiaw mo ba nang hantod karon nganong dili man gyud maka-ako ang mayor sa Talisay nga mapriso si Joavan.

Kun nakabantay kamo, makapila madakpi si Joavan ug sa mga dakop, sakyanan nga minarkahan og mayor ang kanunay’ng masugatan sa kapolisan.

Tinuod nga adunay daghang mga “political kids” nga hambugero kaayong maggamitgamit sa sakyanan sa ilang mga ginikanan nga mayor, bise mayor, kongresista, senador, cabinet, secretary, judge, bisan konsehal ug abogado.

Apan kining kang Joavan makaduda kaayo nganong hapit sa tanang higayon nga ma-engkuwentro niya ang kapolisan kun dili opisyal nga sakyanan sa gobyerno ang gimaneho, ang Isuzu Bighorn nga nagtangag og plakang “MAYOR.”

Makadaghan na ko makadungog nga adunay kadudahang negosyo si Joavan. Kun unsa man kini, ambot tinuod ba ang pangagpas sa uban nga ang paggamit og sakyanan sa gobyerno o sakyanan nga minarkahan og MAYOR sayon ra makalusot gikan sa mga mata sa mga awtoridad.

Kun balikan nato ang nangaging mga dakop nga naglambigit kang Joavan, adunay mga misteryong manghitabo, sama niadtong pagdalidali og kuha ni Brod Soc sa usa ka bag nga ubos na unta sa kustodiya sa kapolisan. Unsa man kadto? Dili ba kaha kadto maoy negosyo ni Joavan?

Pero nganong sa mga searches sa kapolisan sa iyang sakyanan, wala may mga kadudahang butang nga nakuha?

Pagkadakong misteryo!

* * *

Gikiha si Mayor Michael Rama sa mga residente nga nanimuyo sa Mahiga creek kay nganong gipapahawa sila sa ilang mga pinuy-anan nga walay gitanyag nga relocation site o financial assistance.

Pero kining kiha sa mga residente sa Mahiga creek nga gilangkoban sa lima ka sityo sa barangay Mabolo nahitabo human sila gihagit ni Mike nga ikiha siya.

Ug intawon gikiha gyud siya.

Apan si Rama kanunay’ng mobarog nga sakto siya sa iyang pagpapahawa sa mga residente. Apan ang mga residente nga miyembro sa urban poor, pinaagi sa kanhi city administrator nga si Bimbo Fernandez, nagkanayon nga sa higayon nga mobisita nila ang demolition team gikan sa city hall, dili sila makapakita og konkretong probisyon sa relocation site.

Nganong wala may gitanyag nga relocation site si Mike? Nganong dili man usab siya makamando sa city council nga pahatan na lang og budget gikan sa pundo sa siyudad aron ihatag sa mga residente nga naigo sa demolisyon diha sa Mahiga creek?

Apan sa habig sa mga taga-Mahiga creek? Kinahanglan ba gyud nga ingon ana ka dako ang aksiyon batok sa mayor sa siyudad?

Kun wala sila hatagi og relocation site, kiha ba diay ang sakto nga aksiyon? Hain naman ang dayalogo?

Pero taym pa, nganong si Bimbo man ang main complainant? Mao tingale nga ingon na niini kadako ang isyu nga nangabot na mo sa Ombudsman ug Regional Trial Court kay giapilan naman og politika.

Maayo tingale hunahunaon og balik sa mga taga-Mahiga creek ang ilang pag-uyon nga ikiha na lang ang mayor kay wala sila hatagi og relocation site.

Nasayod man kitang tanan nga sa kiha-kiha, abtan pa kita og siyam-siyam una pa ma-settle bisan ang gamay kaayong setolonon.

Kay gipaabot man sa korte, malangay gyud na ang gamay’ng problema sa mga taga-Mahiga creek nga mao ra ang relocation site. Nagtuo ko nga kun ipaagi lang sa dayalogo, maminaw man tingale ang mayor ug sa katapusan mo-uyon ra og relocation site.

Estoryaha na lang na ninyo uy!