Run for mom

Sayang na sayang at hindi ko nalaman

na si Tita Betty ay pararangalan;

Nang nagdaang Linggo “Mothers Day” pa naman

parangal sa Kanya ay ang ‘Run for Mom’!

Nasabing takbuhan maraming lumahok

kung kaya kay saya’t si Tita ang tampok;

Panghihinayang ko ay di malalagot –

kaya itong pitak sa Kanya ay handog!

Sa PStar Ngayon ako’y nagsusulat

pero ang “Run for Mom” walang nagsiwalat;

Hindi man tumakbo ay pagbati agad

kay Sir M. Belmonte na butihing anak!

Nasabing takbuhan kung agad nabatid

dahil ako naman ay wala pang sakit –

Kahit may edad na ako ay sasaglit

siguro ang 2K tatakbuhing pilit!

Betty Go ang kanyang tunay na pangalan

at naging Belmonte nang sila’y pakasal –

Nang ngayo’y Speaker ng ating Batasan

pagsasama nila’y malaking tagumpay!

Mga anak nila ang siyang nagmanang

humawak ng dalwang STAR na maganda;

Sa pamamahala ay mahusay sila

kaya ang publishing ngayo’y nangunguna!

Nagpundar ng STAR ay si Tita Betty

ang patnubay niya ay napakabuti;

Mga empleyado, mga dukha’t api

tinutulungan n’ya at kinakandili!

Matagal na noon pero tanda ko pa

ang STAR at ako nang hawak ni Tita

Sa malaking building nang doo’y mapunta

sa munting gusali naunang umupa!

Noon ang Editor ay si Tony Roces,

saka si Andrew Go – butihing kapatid;

Nitong Tita Betty na lubhang mabait

kaya pati ako ay nabigyang break!

Pilipino STAR noo’y buhay na rin

ang Editor noon ay si Joe Buhain;

Kami ay masaya at di namin pansin

ang galit ni Marcos – nagkulong sa amin!