EDITORYAL - Hepe sa IMF bad kaayo

Ang kaso sa hepe sa International Monetary Fund Dominique Strauss Kahn nga nabaniog dayon ug nakapakurat sa tibook kalibotan pipila ka gutlo human sa hitabo, usa baya kini ka butang angayang panaminan sa inilang mga tawo sa katilingban.

Si Kahn, usa ka gipaabot nga mahimong maayong material sa pagka-presidente sa Francia sa umaabot nga election.

Apan naamong ang iyang pagkatawo sa hinayop niyang gihimo ngadto sa usa ka utility worker nga Africana kinsa misulod sa iyang lawak aron pagpanglimpyo.

Apan migawas ang babaye nga nagkamamad ang tingog sa hilabihang kahadlok sa pagluok kaniya sa usa ka tawong wa niya hiilhi apan natiman-an niyang usa ka tawong ubanon na og buhok.

Giasoy sa 32 anyos nga trabahante sa mga kaubanan niya sa usa sa labing mahalon ug dakong hotel sa New York nga dugay siyang giablihan sa pultahan sa usa ka lawak nga iyang limpyohanan.

Apan human sa pipila ka minuto nga tinuktok, naabli ang pultahan sa lawak ug sa didto na siya sa sulod maoy nabantayan nga gikandado dayon sa tawo ang pultahan niini.

Dayon way panagana nga migakos kaniya og piit kaayo dayon gipanghinol ang mga importanteng bahin sa iyang lawas hangtod nga gilaksi na ang iyang underwear, ug ang labing pait kay gipaum-om kaniya og pugos ang kinatawo ni Kahn.

Sa iyang huygo tudong pangusog, nakaipsot siya gikan sa mga kamot ni Kahn , nakadagan ug nakapanugilon sa gibuhat ni Khan kaniya.

Mura og di makatuo ang kadaghanan, apan si Kahn mikagulkol sa prisohan pipila ka takna human sa hitabo nga wa dawati og piyansa sa hukmanan.

Dinhi sa ato wa kahay daghang pareho kang Kahn? Di   ba?