Usa ka kasaligang tinubdan ang mitug-an kanako nga nagpadayon gihapon ang smuggling sa bugas. Ang palusot sa bugas sayon ra kaayong nakaabot ug nakasulod dinhi sa Sugbo tungod kay limpyo na ang dalan nga giagian niini. Mga sugboanon usab gihapon ang nalambigit sa smuggling sa bugas nga gilangkoban sa Big Six nga sila si HG, managsoong PL ug DL nga di gyod matarog gumikan sa kalig-on sa gisandigan, si P nga mao gyod ang pinakakaraang smuggler nga taga Mandaue, si K nga hari sa ukay-ukay pero giapil sa pag-ukay ang bugas ug si Jane.
Sa unom si DL mao ang pinaka ngilngig, gilupig niya ang iyang igsoon nga si PL tungod kay bisan og magkinaunsa makalusot gyod ang iyang bugas.
Kagahapon gitug-an sa akong kasaligang tinubdan nga aduna na usay 300 ka 20 footer container vans nga pinalusot nga bugas ang miabot dinhi sa Sugbo. Ang maong pinalusot nga bugas gisulod kini sa OOCL nga container vans ug labing seguro samtang nagsulat ko ning akong column nahanaw na ang maong bugas.
Ang akong kasaligang tinubdan nagkanayon nga ang palusot sa bugas nagpadayon nga dili kaayo baniog sa publiko tungod sa tabang sa pipila ka mga lehitimo ug dili lehitimo nga sakop sa media nga nabayran sa mga smugglers ug sa ilang mga brokers.
Dugang pa sa akong source nga aron dili halata dinhi sa Sugbo ang smuggling sa bugas adto kini i-agi sa mga smugglers sa Davao ug Cagayan unya isakay na lamang kini sa mga barko nga gikan sa nahisgutang mga dakbayan busa ang dating lokal nga bugas ang miabot ug dili gikan sa gawas sa nasud.
Ambot og wa ba makahibalo ang atong Bureau of Customs sa Cebu Port mahitungod ning maong paagi sa pagpalusot sa bugas? Kun kabahin sila sa arrangement sa mga smuggler dugay ra silang nasayod niini pero kun wa manghinaot ko nga mohimo sila og tukmang lakang mahitungod niini aron mahasubay ta sa matuwid na daan.