Daghang mga bana ang gibuhi sa ilang asawa

Sukad pa sa sinugdan ato na nga nabatasan nga ang mga bana mao gayod ang mobuhi sa ilang asawa. Sa katarongan nga ang mga bana mas kusgan ug mao ang pangulo sa pamilya. Isip rayna sa panimalay ang katungdanan sa ginang sa panimalay mao ra ang paghikay, panglaba, panglimpyo, pag-atiman sa mga bata ug bana nga mahiabot gikan sa trabaho.

Apan, gumikan sa atong sosyal ug kulturahon nga kausaban daghan na karon ang mga bana nga gibuhi sa ilang asawa. Pananglit, mga habal-habal drayber nga gibuhi sa ilang asawa nga mga magtutudlo. Mga kawani sa gobyerno nga hamtong na apan naminyo og mga batan-on nga walay kursong natapos.

Ug mga contractual workers nga mga bana kansang contract sa panarbaho natapos na. Ang ilang mga asawa nga adunay stable job mao ang makabuhi kanila. So, ayaw og kahibulong kun adunay mga bana nga mao nay molaba ug mokanta aron sa pagpakatulog sa iyang bata.

Mahitabo gayod kini kay aduna man gayoy tawo nga manghantok o mangigo og mga chicks. Nga mopahimulos sa ilang ka gwapo. Tungod sa ilang maayong hitsura mangigo sila og hamtong na nga kawani sa gobyerno nga mora og apiki og hitsura unya ilang pangasaw-on.