After EDSA unsa na ta karon?

Mao ni ang hustong paghandom sa EDSA people power. Dili kay picture-taking lang ug dugang pagdaot ni Marcos. Humana to. History na to. Ato nang gipatiran si Marcos nga hangtud karon, wa pa malubong.

Atong handumon ug atong i-celebrate ang atong mga nahimo 25 years ago. Dili kinahanglan nga maghandom ta matag tuig sa kadautan ni Marcos. Atong handumon instead ang atong pagka-maayo ug pagkabuotan opposite ni Marcos.

Mangutana dayon ta ngano nga sa kadautan ni Marcos, naka-export man tag bugas, ug ngano nga sa atong katarong ug kabuotan, mas nagkagidlay man kita karon kay sa panahon ni diktador Marcos?

Mangutana sad ta kun ngano nga si Marcos ray atong gipalagpot ug atong gipabilin ang corruption?

Mao ni, among others, ang atong saulogon matag Pebrero 25, unsa na ta karon, dili unsa kita panahon ni Marcos.

* * *

Kadaghang city hall awardees! Mao ni ang komentaryo sa pipila ka taxpayers nga nangutana kun nganong awardan sila nga suweldado man. Buot bang ipasabot nga kadtong wala maka-award, wala magtuman sa ilang mga katungdanan?

Kadtong religiously nagtuman sa ilang katungdanan, tagaan lag certificate of appreciation, ug kun dunay kahigayonan, i-promote ug umintohan ang sweldo. Ug ang mga ligoy, mga tapulan, ug mga arogante, i-due process ug palagputon.

Sa laktud, di kinahanglan mogasto tag daku kaayo aron pagpausbaw sa public service sa city hall.

* * *

 Mi-approve ang atong gobyerno og 3 bilyones ka pesos aron ipamalit og condom ug mga contraceptives nga tambal aron masulbad ang kawad-on sa nasud. Sa ato pa, alang sa atong mga kongresista (unsa kahay stand sa atong mga Cebu congressmen no?), ang sulbad sa poverty sa atong nasud, mao ang mga condom ug mga contraceptives, kay pinaagi niini, kapugngan ang pagpanganak, and at the same time, makapatuyang ang tawo pagpakighilawas, sama sa mga iring ug mga iro. 

Sa Amerika, nag-debate sila kun maisip ba nga protective measures ang abortion, ang paggamit sa mga contraceptives ug mga condom. Dinhi sa ato, morag kombinsido ang atong mga magbabalaud sa Lower House nga makaayo ang RH bill.

Giingon nga usa sa dakung nakapa-ut-ot sa atong nasud, mao ang corruption ug ang dakung tinubdan sa corruption mao ang pork barrel. Waa motuo ang atong mga kongresista niini, hinungdan nga morag ilang umintohan ang pork barrel, kay alang nila, ang population explosion maoy nakapa-pobre sa atong nasud.

Busa, padayon ang pork barrel, ug kinahanglan ipasar ang RH bill. Uyon ka ini, Dro?