Suholan dili allowance

Nagprotesta ang mga anak sa singot didto sa kaulohan human sila hatagi og 22 pesos nga cost of living allowance sa mga sakop sa National Capital Region Tripartite Wages and Productivity Board.

Una niini ang mga anak sa singot nga sakop sa mga progresibong grupo nangayo og 125 pesos nga legislated nga umento sa suholan samtang ang mga moderate nangayo og 100 ka pesos nga umento sa suholan apan ang gihatag kanila sa wage board allowance.

Daw gibugal-bugalan sa wage board ang mga anak sa singot didto sa kaulohan tungod sa gihatag niining 22 ka pesos nga cost of living allowance. Ang nakapait, ina kay am-aman sa Malakanyang ang nagdugo nga kasing-kasing sa mga anak sa singot gipun-an pa hinoon niini ang ilang mga kasakit. Matud pa sa Malakanyang, ang 22 pesos nga allowance nga ihatag sa mga magpapatigayon bintaha ug maayo na lamang kuno kini kay sa wala o zero nga umento.

Dinhi sa Central Visayas, magtagbo pa ang mga sakop sa Regional Tripartite Wages and Productivity Board aron tukion ang gipangayong umento sa suholan sa mga anak sa singot. Agi og pahinumdom sa mga sakop sa wage board dinhi sa Central Visayas kay basin og nalimot sila nga ang gipangayo sa mga anak sa singot umento sa suholan ug dili allowance. Busa ayaw ninyo sila hatagi og cost of living allowance kay ang ilang gikinahanglan mao ang umento sa ilang suholan.

Happy Birthday diay ngadto sa akong anak nga si Jay nga nagsaulog sa iyang adlaw’ng natawhan karong adlawa ug ako usab nga i-welcome ang akong mga ginikanan, in-laws ug mga igsoon nga naa karon dinhi sa Sugbo alang sa pagtambong sa adlaw’ng natawhan sa ilang apo ug pag-umangkon.