Sa imong pagpili sa dalan

Dunay duha ka mga dalan nga angayan natong tan-awon. Ang dalan sa balanse ug ang dalan sa pagkawatas-watas. Apan sa dili pa kita maghisgot niini ato unang tukion kun unsa ug kinsa ang naka-impluwensiya nato sa dihang gihimo nato ang pagpili. Si Dr. Philip McGraw, PhD sa iyang libro: “Self-Matters” ang mipadayag nga dunay duha ka matang sa kaugalingon nga anaa sa kanunay’ng tensiyon diha sa tawo. Ang Fictitious Self (Dili tinuod nga ikaw) ug ang Authentic Self (Tinuod nga ikaw).

Ang dili tinuod nga ikaw. Matang sa kaugalingon kang kansang lihok ang nagasukad sa gawas ug sa palibot. Kini naglangkob sa mga panggawas nga ikasulti sa mga tawo nganha kanimo. (sama pananglit sa imong propesyon, kaliwat, relihiyon ug uban pa). Ang mga tawo mohimo sa ilang hukom pinasikad ning maong mga sukaranan. Ikaw pud sa laing bahin kun mohimo og mga desisyon sa kinabuhi ang posibleng mohimo pinasikad sa maong sukaranan usab. Moingon ka: “Katoliko ko busa dili na lang ko makigsuod ni Jean nga Baptist unsa na lay ikasulti sa ako mga ginikanan nga sakop sa Parish Pastoral Council!” (Apan ang tinuod, kalipay mo unta ang pakigsuod niya. Sa laktod imo siyang gihatagan og gibug-aton dili tungod kay kabubut-on mo kondili napugos ka lamang. Sila nalipay apan sa kahiladman mo anaa ang pagmahay. Ang mga tawo nga nihimo og desisyon pinasikad ning maong sukaranan ang maglisud pagkab-ot sa gitawag nilang kagawasan. Walay bulok ang ilang kinabuhi. Ug kay walay bulok dili sila magmalipayon.