Duha ka distrito sa sixto distrito

Human mahimong lone congressional district ang dakbayan sa Lapu-lapu gisugyot karon sa uban nga maoy isunod sa pagka lone district ang dakbayan sa Mandaue. Matud pa sa mga nagduso niini nga hinog na nga mahimong congressional district ang Mandaue ug mas kwalipikado pa gani kini kun ikomparar sa dakbayan sa Lapu-Lapu nga usa na ka lone congressional district.

Apan ang paghimong lone congressional district sa dakbayan sa Mandaue gisupak ni kongresista Luigi Quisumbing sa ika-unom nga distrito sa lalawigan sa Sugbo tungod kay mabiyaan ang lungsod sa Cordova ug Consolacion nga sakop niini.

Si Mayor Jonas Cortes uyon nga mahimong congressional district ang iyang dakbayan tungod kay makapahimulos kini sa 70 milyones nga pork barrel nga gigahin sa matag kongresista apan wala mouyon niini si bokal Teddy Ouano sa ika-unom nga distrito ug usa ka Mandauehanon gumikan kay murag mabiyaan sa tunga sa lawod niini ang lungsod sa Consolacion ug Cordova.

Si bokal Teddy Ouano misugyot nga inay ang Mandaue lang ang himoong Congressional district himoon na lamang kining duha ka distrito aron maapil ang Consolacion ug Cordova. Ang duha ka distrito mao ang Mandaue North district ug South district. Ang Mandaue North district pagalangkoban kini sa mga barangay nga nahimutang sa Norte nga bahin sa Mandaue ug iapil ang lungsod sa Consolacion samtang ang South district sa Mandaue pagalangkuban sa mga barangay nga nahimutang sa South nga bahin sa Mandaue ug iapil ang lungsod sa Cordova. Sa ingon ani nga paagi dili mabiyaan ang duha ka lungsod sa ika-unom nga distrito sa lalawigan sa Sugbo.

May punto si bokal Teddy Ouano sa iyang sugyot ug sa akong tan-aw mas madawat kini sa katawhan sa Cordova ug Consolacion. Mas maayo kini kay sa magkaproblema ang duha ka lungsod kun asa sila magpasakop. Mas maayong lingkoran nila ni kongresista Luigi Quisumbing ug Mayor Jonas Cortes kining sugyot ni bokal Teddy Ouano aron maplantsa ang tanan kun gusto man gyod nila nga maghimo og laing distrito sa ika-unom nga distrito sa lalawigan sa Sugbo.