Ang tinuod nga bahandi

Daghan ang nagtuo nga abi kay dato o bahandianon na ang usa ka tawo malampuson na siya. Mahimo nga ato siya nga matawag nga malampuson. Apan, dili super achiever. Ilabi na kun ang makapahimulos sa imong bahandi mao ra kadtong mga sakop sa imong banay.

Alang kanako ang labing malampuson nga tawo mao kadtong makapaambit sa iyang bahandi ngadto sa daghang mga tawo. Tawo nga andam og tagana nga mopainom og tubig niadtong giuhaw, andam nga mopakaon niadtong gigutom ug andam mohatag og bisti niadtong mga hubo.

Kay kadtong nakatagamtam sa imong kaayo mao man ang mobandilyo mahitungod sa kalumo sa imong balatian sa tibuok kalibotan. Mahimo usab nga ang mga kaayohan nga iya nga gipaambit kanimo dili mo na sab hikalimtan hangtod sa hangtod.

Apan ang mga tawo nga wala gayod makapaambit sa ilang kadato ngadto sa mga kabos libakon lang sa naulahi nga hangol ug hakog sa bahandi.

Apan, ang mga bahandianon nga may malumo og balatian kanunay nga hisgutan niadtong mga tawo nga nakaambit sa iyang pagkamanggihatagon.

Ang pagpangabig sa mga kalag nga nahisalaag o wala pa makaila kang Kristo isip ilahang Ginoo ug personal nga manluluwas usa sab ka dalaygong butang nga makapahimuot sa Ginoo.

Ilabi na kun imong nabiyaan ang imong pamilya aron lang sa pagpangabig og mga kalag sa halayong dapit. Ilabi na kun gilutos kamo o gipamatay aron lang sa pagsangyaw sa maayong balita sa kaluwasan. Dalaygon kita kun makabuhat kita niining duha ka mga dagkong kalihokan kay kini ang matuod nga bahandi sa tawo.