Ang dalan

Ang atong tagsa-tagsa ka mga sugilanon ang naumol gumikan usab sa mga unang mga karakter nga nalambigit niini. Kuyog niini ang mga significant others (Mahinungdanong mga uban o kauban). Kini naglangkob sa atong mga ginikanan, mga uyoan, apohan, mga igsuon ug uban pang mga tawong nalambigit kanato ug sa ginagmay man o dinagko ang nakaumol usab kanato. Ang atong mga taras ang naapektohan sa matang sa dalan nga unang gipili sa atong mga significant others nga sa ngadto ngadto ila pud nga gipahamtang nganhi kanato. Ang konkretong ehemplo niini mao nga ang usa ka bata nahimong dunay posibilidad nga mamalikas kun diha mismo sa iyang palibot kanunay niyang nadungog ug nasinati nga giamoma ang kultura sa balikas. Kini tungod kay ang mga significant others ang nipili man o dili ba kaha ang nagpaundayon nga himuong kabahin sa kinabuhi na ang balikas.

Ang maong kutay sa kinaiya ug pamatasan adunay sinugdanan. Kaniadto ug bisan karon, tungod kay namat-an man ug buot nga ang mga bata kinahanglang modaplin una o motago ug dili makigsandurot sa mga dagko. Ang uban nakalingkawas ning maong kutay ug naantigong mopadayag sa ilang kaugalingon samtang ang uban ang nagpabiling mubo ra ang pagtan-aw sa kaugalingon. (Low Self-Esteem). Ang bata naglibog kay ang paagi sa pagpasabot kaniya sa sitwasyon ang usahay dili man mohaom sa iyang pangedaron ug kahimtang. Mao nga ang kalipay sa tawo wala magsukad ingon nga destino hinunoa, kabahin sa panaw. Ang panaw padulong sa kalipay ang nagaagad sa atong pagpili. Duha ang pilianan diha sa kinabuhi. Una, ang dalan sa balanse ug ang dalan sa pagkawatas-watas.