Paita ninyo uy!

Tan-aw nako katoohan g’yud ang pasangil nga si Wilfredo V. Wagas nangilkil gikan sa tagdumala sa Body & Sole Spa.

Abi ninyo og ngano? Gilapas niya ang kamandoan ni Department of Labor and Employment (DOLE)-7 regional director Exequil Sarcauga nga dili gayud makigtagbo sa mga party sa gihuptan nilang kaso.

Basi sa report, hearing officer si Wagas sa kaso nga naglambigit ni Johny Lim sa Body & Sole Spa. Sa ato pa, dili gayud siya angay’ng makigtagbo kang Lim gawas sa opisina.

Moreklamo kaha si Lim kun wala pa pangayoi? Pastilan kun ingon niini ang kalidad sa atong mga kawani sa kagamhanan, kalooy sa mga kawani nga nagpatabang man gani sa DOLE.

Kun tinuod nga wala mangilkil si Wagas, bi unsa man kaha’y rason nga pasanginlan ni Lim ang hearing officer sa DOLE aron lang g’yud dakpon?

Aw hinuon, sagdi lang kay hatagan pa man og “due process” si Wagas, atong tan-awon kun unsa’y iyang rason. Apan si DOLE regional director Exequil Sarcauga nasuko g’yud ug nauwawan sa pagkasikop ni Wagas.

Kini baya si Wagas no nagsweldo kini og mga P31,000 ang buwan, sa ato pa nag-usa ka libo ka pesos ang adlaw. Isip hearing officer sa mga kaso ayaw g’yud pakig-estorya sa mga tawo nga nalambigit sa kaso gawas sa opisina.

Unsa gud tawo’y inyong panagsultihan sa gawas. Kun atong toohan ang imong pamahayag nga higala nimo si Lim, angay ka nga mo-inhibit paghusay sa iyang kaso aron dili katahapan nga bayas ka sa imong findings.

* * *

Nakadawat ko og report nga usa ka division head sa City Hall nalambigit og pagpangilkil. Ang report nga nahipos sa akong mga kaubang reporters mao nga pahulipan na unta ang maong opisyal apan nanghimakak man si Mayor Michael Rama.

Nalipay ko pagkadawat sa report kay walay maayong trabaho ang maong opisyal, apan kusganon man nga nanghimakak si Rama nga may giplanohan siya’ng tangtangon sa iyang mga division chief.

Ang ako lang unta niining Rama mao nga dili lang siya magpalabi sa iyang kamaayong tawo, nga maikogon kaayo sa iyang mga higala, ilabi na kun daku kaayo og natampo kaniya sa miaging eleksyon.

Mag-unsa man ang grabeng paglaban kanimo sa politika sa maong tawo kun mao kini ang moguba sa imong gigambalay nga kalamboan sa dakbayan? Ang maayong manager sa usa ka kagamhanan mao kadtong tul-id sa pagpatuman sa balaud sa walay pagpinig kun kinsa man ang maigo.

Apan pastilan, daghan sa iyang mga lumalaban kaniadto gisweldohan sa City Hall bisan og walay klaro nga trabaho. Dagko ra ba kaayo’g sweldo kining maong mga consultant bisan og walay obra.

Maayo lang unta og sama sila ni Jack Jakosalem nga mitrabaho g’yud. Naa sa opisina sa Citom matag adlaw bisan og ang Chairman sa CITOM mahimo ra unta og moanha lang atul sa miting.

Kana maoy sundon unta sa mga consultant diha nga walay trabaho ug ikatandi ra sa usa ka alimatok nga nagsigi’g supsop sa kwarta sa dakbayan. Sayud ko nga sakitan kadtong naigo ug malipay kadtong mga nagtuman sa ilang katungdanan.

* * *

Lipay man gani ko nga dunay pipila ka consultant nga wala na gi-renew kay wala man sila’y agi.

Ang pag-hire og consultant mahimo lang kun walay maantigo sa iyang abilidad diha sa mga kawani sa kagamhanan, apan “por dios y por santo” bisan ang nagtudlo kanila nasayud nga “purely political accommodations” ra ang pagtudlo kanila.

Mao kana kay wala man sila’y angayang trabahoon, maghuwat ra sila nga mosulod na sa ilang account ang dagko nila nga honoraryom. Apan kini maoy hinumdumi, gabaan baya mo.