Giunahan na ni Ombudsman Merceditas Gutierrez ang impeachment court. Kaniadtong miaging semana miluwat na gayod sa iyang katungdanan ang Ombudsman nga sulod sa pipila ka tuig natulog ug nagpakabuta-bungol sa mga kasong gisang-at batok sa iyang amo diha sa iyang buhatan. Salamat kay may nagpabilin pa diay’ng diyotay nga kauwaw si Ombudsman Merceditas Gutierrez.
Pero sa iyang pagluwat sa katungdanan nakalingkawas na ba siya sa mga kaso nga posibli unyang ipasaka batok kaniya? Kana kun ugaling may magpakabana pa unya sa pagpasaka kaniya og kaso.
Ang impeachment nga gipasaka batok kang Gutierrez usa ka pamaagi nga gilatid sa atong batakang balaud mahitungod sa pagpapahawa sa usa ka impeachable nga opisyal. Way laing tumong ug tuyo ang impeachment gawas sa pagpapahawa ra gayod sa impeachable opisyal, kini ug wa nay lain pa. Mao nga human unya mapapahawa ang impeachable opisyal sa katungdanan isunod na dayon ang pagpasaka kaniya og kaso nga makapapriso ug makapabayad kaniya.
Karon nga miluwat na si Ombudsman Merceditas Gutierrez sa iyang katungdanan, aduna kahay mopasaka kaniya og kasong makapabalhog kaniya sa prisohan? Dili kaha mahilom ang mga tawong nagsaway ug nagduso sa iyang impeachment?
Napanimahoan na ni Ombudsman Gutierrez ang iyang pagka impeach sa Senado maong iya na lamang kining giunhan aron masalbar pa ang medyo baga-baga na niyang dagway sa kauwaw. Dili gusto si Gutierrez nga mabutang sa kasaysayan sa Pilipinas nga siya ang pinakaunang opisyal sa gobyerno nga natang-tang sa katungdanan pinaagi sa impeachment.
Dinhi sa ato, kanus-a pa man moluwat sa iyang katungdanan ang deputy ombudsman dinhi sa Visayas nga naliwat sa iyang amo. Mura man og nagpakahilom lang si deputy ombudsman for the Visayas Pelagio Apostol. Milayas naman ang imong idol sa iyang katungdanan Mr. Apostol, ikaw kanus-a man ka molayas diha sa imong katungdanan? Magpabaga gihapon ka?