EDITORYAL - Ang pagbag-o sa sistema sa edukasyon

Kining sugyot nga dugangan og duha ka tuig ang naandan nang 10 ka tuig sa elementarya ug sekondarya nga edukasyon makapasamot kabangkarota sa mga ginikanan nga daghan og anak.

Makapasipok kini sa ulo sa mga ginikanan nga punayag sulsol nga dakong sala ang pagpugong sa pagpanganak pinaagi sa family planning nga gitudlo sa gobyerno.

Kini tungod kay ang mga ginikanan nga naa sa akto nga paghimo og bata kun makahunahuna niining sistemaha, mauknol lang og kalit ug mopreno dayong hinuktok.

Usa ra ang naa sa ilang hunahuna, kun unsaon kaha nila pagpa-edukar ang ilang anak karong migrabi na kamahal ang bayranan sa eskuylahan ug giplano na usab nga dugangan og duha ka tuig ang elementary ug sekondarya.

Taym pa daghan na kaayong mga Pilipino nga maayong laki nga tua gabok na ang mga bukog sa lubnganan ug tested o hingpit nang nasuwayan ang kasamtangang sistema sa edukasyon sa nasud nga naghatag og maayong dungog sa mga Pilipino sa natad sa edukasyon.

Kadtong mga nasud nga naanad na sa pagsagop nianang 12 anyos nga elementarya ug sekondarya, pasagdahan to sila ug di to nato angayang sundon kay ang mga Pilipino adunay kaugalingong sistema sa edukasyon.

Ning panahona karon nga nabun-og na pag-ayo ang ekonomiya sa nasud gumikan sa kadaghang kawatan sa kuwarta sa gobyerno, unya pabug-atan pa pagsamot ang mga kabus, unsa naman lay mahitabo sa ilang mga anak ugma damlag.

Kun karong panahona, daghan na kaayong mga ginikanan nga di makapalampos sa pagpatungha sa ilang mga anak gumikan sa kalisod sa kahimtang sa panginabuhi, unsa pa kaha kun dugangan pa og laing duha ka tuig ang sistema sa edukasyon.

Kun ang mga nakalampos karon sa pag-eskuyla naglisud pa sa pagpangita og trabaho kay wa may daghang trabahoan dinhi sa ato, unsa na kaha ang wa kalampos og kurso. Di   ba?