Daghang mga utanon nga nasakmit sa mga sakop sa Cebu City Market Operations Division nga gi-display sa karsada sa Carbon market lapas na sa gitugot kanila nga oras nangalata na lang.
Gihuna-huna nako pag-ayo, nalooy ko sa mga tindera nga gisakmitan sa maong mga baligya. Nasiguro ko nga nakasinati sila og grabeng alkanse, inay nga makaganansya. Gikan pa kaniadtong Lunes hangtud kagahapon ug kaniadto pang miaging semana nga daghang baligya ang gisakmit.
Naabtan nako didto sa opisina ni Market Administrator Raquel Arce ang pipila ka tindera nga tingali mohangyo nga ma-release ang ilang mga baligya nga gisakmit. Apan ang uban, mipauli na lang kay nakita nila nga dili na kapahimuslan ang ilang baligya.
Mga prutas sama sa sinagwelas, mga utanon sama sa tangkong, mga puso sa saging, duna sa’y mga saging gardaba ug daghan pa nga mga baligya nga nangalata na lang. Ang uban nga nasakmit nga butang gipanghatag na lang sa lainlain nga mga charitable institutions.
Matud ni Arce nga apil sa ilang gihatagan mao ang Parian Drop-in Center, Community Scouts, Asilo dela Medalla Milagrosa ug ang usa ka grupo sa mga misyonaryo diha sa Talamban.
Balikon nako, nalooy ko sa mga tindera, apan unsaon man usab nga gahi man sila kaayo’g ulo. Kaadlawon pa nga ang mga sakop sa Market Authority nag-awhag kanila nga hiposon na ang ilang baligya gikan sa karsada aron dili kini makahasol sa pag-agi sa mga sakyanan.
Ang maong mga tindera nga nasakmitan sa ilang baligya mibaliwala lang sa awhag nga kinahanglang inigka-alas sayes limpyo na ang karsada. Mao nga gisakmit ang ilang mga baligya.
Susama ra gayud kini sa mga drayber nga kanunay namo nga madakpan sa operation sa Land Transportation Office nga dili unta kami gusto nga manakop, apan unsaon nga magpabadlong man g’yud sila, dili man motuman sa mga sayon ra kaayong lagda.
Mao kini ang giingon nga “Dura lex sed lex” nga nagkahulogan nga “the law is harsh, but it is the law.” Ang mga sakop sa market operations division sama ra sab namo sa LTO, igo ra kami nga nagpatuman sa balaud. Kun ang nasud walay balaud magkaguliyang kita.
* * *
Gibarugan gayud sa mga abogado sa City Traffic Operations Management (CITOM) nga ang dakbayan mao gayu’y dunay gahum sa paghimo’g travel line sa mga passenger vehicles nga mosulod dinhi sa dakbayan.
Nagpasabut kini nga bisan og gibutang pa sa prangkisa sa LTFRB nga ang rota nga agian sa usa ka PUJ mahimo kini nga usbon sa dakbayan.
Ang argumento sa mga drayber mao nga ang LTFRB gayud ang adunay dakung katungod sa paghatag og rota. Ang tumong lagi sa dakbayan mao nga maminus ang mga sakyanan nga magsudlanan sa atong kadalanan.
Husto baya. Tiaw mo kun ang tanang mga sakyanan nga nagpanawan gawas sa dakbayan sa Sugbo tugotan sa pagpamasahero dinhi sa dakbayan, pwerteng samoka kaha no? Dili usab mahimo nga did-an ang uban unya ang mga PUJ ra sa Mandaue ang tugotan.
Ang maayo ninyo mga drayber, dad-a kining maong punto sa labaw’ng hukmanan. Kun moingon ang labaw’ng hukmanan nga sayop ang dakbayan sa Sugbo, ipalanog ang inyong langgis kaayo nga talidhay.
Unsaon man gud nga ang uban ninyo nga mga drayber abusado man kaayo. Mohunong sa wala gitugot nga dapit, apil na diha tungod g’yud sa ganghaan sa simbahan sa Basilica.