Kaligdong sa PB

Usa sa mga kawsa nga kusganong gibarugan ni Bise Gobernador Greg Sanchez, nga gikahadlokang mabiyaan karong masakiton na siya, mao ang pagpanalipod sa kaligdong sa Provincial Board (PB) gikan sa paggawong sa buhatan ni Gobernador Gwen Garcia. Bisan sa wa pa mahibaw-i ang iyang kanser sa baga, si Sanchez ray nagtikaw-tikaw pagkuwestiyon sa giingong pagpanghilabot ni Garcia sa pagpagawas sa ilang pundo ug sa paglab-as sa kontrata sa mga kawani sa PB.

 Bisan gidasonan sa Civil Service Commission (CSC) ang baruganan ni Sanchez batok sa pagputol ni Garcia sa kontrata sa mga kawani sa PB, gipaabot nga mosamot kamingaw ang iyang kawsa karon nga hastang iyang mga suod niangkon nga himatyon na si Sanchez.

* * *

Mangisog ba ang nipuli ni Sanchez, si Acting Vice Governor Agnes Magpale, pagdason sab sa iyang baruganan? Niadtong makatingog pa si Sanchez, giawhag niya silang Magpale ug ubang sakop sa PB pagbatok sa giingong mga timaan sa pagka diktador ni Garcia:

Ang pagpahamtang og mga bayranan sa mga pasahero ug mga tag-iya og sakyanan sa South Bus Terminal bisan way enabling ordinance sa PB;

Ang paghatag ni P20 milyones nga donasyon ngadto ni kanhi defense secretary Gibo Teodoro nga way pagtugot gikan sa PB; Pagpugong sa Local Assistance Fund (LAF) sa mga sakop sa PB; ug Pagputol sa kontrata sa 57 ka mga kawani sa iyang buhatan sa PB.

* * *

Sukad niadtong baskog pa si Sanchez hangtod karong wa na siya igkita sa mga Sugbuanon, mingaw pa sa tirana ang mga sakop sa PB mahitungod sa kontrobersiya sa kakuwang nila og kaugalingnan. Kasaligang mga tinubdan niingon nga tungod ni sa kamadanihon sa ilang kabuhong kun magpabiling mga alyado ni Garcia kun itandi sa dakong huwaw nga nihasmag ni Sanchez human nibiya sa partido sa gobernadora.

Mahimo ganing molusot ang mga sakop sa PB nga si Sanchez ang ilang idolo. Kay si Sanchez nisugod na lang pagtukol sa pagkontrolar ni Garcia sa PB dihang nibiya na sa partidong One Cebu niadtong Disyembre 2009.

* * *

Karong luya na si Sanchez, nga igo na lang ganing motamla inay mopirma sa mga dokumento sa iyang mga kaso, takos pa ba nga makapanalipod sa iyang kaugalingon sa protesta sa piniliay nga gipasaka ni Glenn Soco, ang naparot nga runningmate ni Garcia sa piniliay sa Mayo sa niaging tuig? Gisalikway ni Sanchez ang pasangil ni Soco nga ebidensiya sa tikas ang depektusong election returns sa Cabangcalan ug Tipolo sa Mandaue City.

Dako’g epekto ang interes ni Sanchez sa kaso: Kun makumbinser niyang Comelec, si Magpale ang motiwas sa iyang termino hangtod sa 2013; apan kun si Soco ang makakumbinser sa Comelec, si Soco di si Magpale ang mopuli ni Sanchez.

* * *

 Email: [email protected]