EDITORYAL - Ang pirma ni VG Sanchez

Ang pirma nga tamla ug ang pirma nga gamitan og sign pen, managsama ra ang gibug-aton ug kabililhon ug anaa sa tag-iya sa maong pirma kun unsay gusto niyang gamiton, tamla o sign pen ba.

Sa bahin ni Vice Governor Greg Sanchez, daghang nakurat dihang imbis sign pen ang ipirma niini sa usa ka dokumento nga alang sa korte gitamlaan nalang niya ang maong apidabit sa kaso nga may labot sa gikagubtang yuta sa pamilyang Balili nga gipalit sa Kapitolyo.

Hinuon kun tinuod mang luya na gyud ang mga kamot sa bise gobernador sa pagbakyaw aron mogunit sa sign pen gumikan sa balatian sa lawas, di baya nato ikatingala.

Di usab angayang himoong isyu nga maghatag og dugang kaguol sa mga pamilyang hingtungdan tungod kay ang tinuod, kitang tanan di ra ba makatag-an sa dagan sa atong lawas ug kinabuhi.

Walay bisan kinsang tawo nga mangandoy nga makabaton og bug-at nga sakit sa lawas.

Gani gimahal nato pag-ayo ang atong lawas tungod kay gusto tang motagamtam pag-ayo sa kalipay ug kasakit ning kinabuhia.

Nasayud na tang daan nga duha ka butang ang atong sagubangon basta may kinabuhi pa ta, kana mao ang kalipay ug ang kasakit.

Apan bisan kun kining kalipay ug kasakit kaluha sa atong kinabuhi, di gyud ta gusto nga pulos nalang kasakit ang atong masugamakan , kundi kun mahimo lang gani mas maayo nga pulos nalang unta kalipay ang atong masugatan ning kinabuhi.

Apan di mahimo tungod kay daan nang gilagda sa Dios, “ang tawo ang gipanganak sa usa ka babaye puno sa kasakit dinhi sa kalibotan”.

Maayo man gani si VG Sanchez kay nakatagamtam og kasakit apan nakasinati og puno sa kabuhong ang iyang kinabuhi, kay kanato nga ordinaryo ra kaayong pagkatawo, apan wala hisayri kun unsa usab kahang matanga sa kasakit ang atong mabagungatan. Di   ba?