Krus ni Hesukristo

Panahon karon sa paghinulsol sa kasal-anan. Panahon sa pamalandong. Nag-antos ug nagpakamatay si Jesus sa krus sa usa ka katuyoan, pagluwas kanatong mga makasasala, sa pagtubos sa atong mga sala. Apan human sa iyang kamatayon, nagpadayon ang pagpakasala sa kalibotan.

Kahakog sa gahom, sa salapi, sa unod ug uban pang matang sa kasal-anan nga nakagay-ot pag-ayo sa moralidad sa katawhan. Anaa ang pagka mabudhion, labi na sa atong ubang ahensya sa gobyerno. Ug makapahinumdom kini kang Hudas Escariote, ang traydor nga apostoles ni Jesus. Gibudhian niya ang anak sa Diyos alang sa iyang kaugalingong interes.

Pila kaha sa atong mga opisyal karon sa gobyerno nga sama kang Hudas? Usa ka dakong sala ang pagbudhi sa nasud ug pagtalikod sa gipanumpaan sa pagpangalagad alang sa kaugalingong kaayohan, alang sa kaugalingong ambisyon.

Sa atong nasaksihan karon sa kalibotan, sa grabeng mga kalamidad, sa kagubot ug gubat, sa kagutom, ug uban pang mga hulga sa pagpuo sa katawhan, makaingon kita nga hapit na ba ang ikaduhang pagbalik ni Kristo sa kalibotan?

Ang kaniadtong kahusay ug kalinaw, karon bisan asang suok sa kalibotan anaa ang kasamok ug mga trahedya. Dili kini usa ka pagsukod sa kalig-on sa atong pagtuo sa Diyos. Kini mugna ra usab natong mga tawo tungod sa atong kahangol sa puwesto ug sa uban pang mga butang nga makalipay ug makapatagbaw kanato.

Puwera sa maayo, daghan gyod kanato ang wala maglantaw sa kaayohan sa kadaghanan. Mao ray atong gitan-aw ang atong kaugalingon, kun unsay makaayo kanato, bahala na kun sakitan ug mag-antos ang uban.

Maayo unta kun sama kang Hudas, naghikog kay wala makasugakod sa tulisok sa konsensya. Apan ang kadaghanan nga nagpakabusog sa gahom ug salapi sa dinautang paagi, nagpabaga lang sa nawong.

Dili maantigong maulaw. Mokatawa gihapon bisag giordenahan na ni Satanas ang iyang kalag.

Natubos na ni Jesus ang atong mga sala apan nagpadayon gihapon siya karon sa pagpas-an ug pag-antos sa kabug-at sa krus tungod sa walay paghupas natong mga kasal-anan. Nagbuhat kitag mga sala sa atong kinabuhi ug ato kining gipadayon karon.

Hinuon walay perpekto kanato. Kitang tanan mga makasasala. Bisan gani ang mga pari nga nagsangyaw sa mga pulong sa Diyos makadakin-as usab. Mabulingan ang gisul-ob nilang sotana kay tawo lang usab sila.

Ang labaw nga mahinungdanon, makamao kitang magbasol ug maghinulsol sa atong mga sala labi na karong panahona nga Semana Santa.