Dok Waykasal

Nalingaw ko sa balita niadtong miaging semana kalabot naidtong doktor dinhi sa siyudad sa Sugbo nga mikakak sa iyang pagka-lalaki ug miatras sa naplano na untang kasal sa iyang uyab nga usa ka estudyante sa medisina.

Si Dr. Alain James Salloman, nadestino sa surgery department sa Vicente Sotto Memorial Medical Center, naanggaan gyud og “Dr. Waykasal” sa amigo nakong brodkaster tungod sa iyang pag-atras sa iyang kasal nga gikatakda unta niadtong Marso 19.

Bitaw, nakaingon gyud ko nga nawala ang pagka-lalaki niining maong doktor tungod kay ang iya pa gyud nga pagbalibad gipaagi lang sa text message.

Sumala pa sa mga balita nga nanggawas na sa mga pamantalaan, si Dr. Salloman ug ang babayeng iya untang pakaslan pulos taga General Santos City.

Sa affidavit sa babaye, matud niini nga si Dr. Salloman pa ang mi-propose og kasal ngadto sa babaye niadtong Mayo 12, 2010.

Gipahibalo dayon nila ang tagsatagsa nila ka pamilya sa ilang paglambigit sa usa’g-usa.

Hunyo 27, 2010 si Dr. Salloman “namalaye” ug natuki niadtong adlawa ang preparasyon sa ilang pagpakasal.

Sa maong sabotsabot, ang pamilya sa babaye miuyon nga maoy moabaga sa mayoriya sa galastuhan sa kasal aron lang matuman ang “dream wedding” sa ilang anak.

Sunod niadto ang pagpakigtagbo sa mga wedding suppliers, namili usab og mga wedding sponsors ug gipahibalo gilayon nila ang ilang mga umaabot ninong ug ninang ug mga guests sa petsa sa ilang kasal. Gipa-book usab nila ang mga tiket sa eroplano sa mga wedding guests ug sponsors nga tua sa gawas sa nasud ug ubang lugar dinhi sa nasud.

Ang doktor ug iyang uyab mitambong og Pre-Cana seminar and marriage counseling session sa Redemptorist Parish niadtong Agosto 1, 2010 sumala sa certificate nga giisyu ni Fr. Rickey Acero.

Mi-aplay usab sila og marriage license nga giisyu ni General Santos City Civil Registrar Isabelita Talizo niadtong Hunyo 3, 2010.

Ang nakapait pa gyud, ang babaye nakabayad na ngadto sa mga wedding suppliers balor og P500,000 niadto pang Disyembre.

Apan puwerte gyud nga pagkahugno sa babaye sa dihang gisultian siya sa lalaki pinaagi lamang sa text niadtong Enero 26 nga nagduhaduha siya sa kasal tungod sa iyang trabaho ug “insecurities.”

Matud sa affidavit nga Enero 30, si Dr. Salloman misulti sa babaye nga wala na siya’y gugma niini.

Human niadto, ang babaye nakadawat na og mga text messages gikan sa doktor nga nagkanayong gi-“cool off” unya niya ang kasal.

Gawas sa pagkahugno sa babaye, na-ulawan kaayo ang pamilya sa babaye kinsa gipasagdan lamang sa lalaki nga mopasabot nga nag-inusara ngadto sa ilang umaabot unta nga mga ninong ug ninang ug mga bisita.

Tungod niini, nangayo ang babaye og P4.1 milyones nga damyos tungod sa iyang nagasto sa pagpreparar sa kasal ug sa kaulawan ug kaguol nga iyang naangkon mugna sa pag-atras ni Dr. Salloman.

Wala ko masayod kun gipangayo ba sa babaye ang silot kaniya sa iyang propesyon isip doktor.

Apan sumala pa nga ang mga tagdumala sa Vicente Sotto Memorial Medical Center nagdumili sa pag-aksiyon alang kang Dr. Salloman. Tinuod nga personal nga problema ni Dr. Salloman ang kasong civil nga iyang giatubang karon sa Regional Trial Court sa Las Piñas, ang lugar diin nanimuyo ang babaye.

Apan apektado ang iyang trabaho niini. Kini ilabi na nga si Dr. Salloman anaa madestino sa surgery department. Unsa man kining surgery department? Siyempre, mang-opera kini.

Nahibaw-an hinuon nako karong bag-o nga malisod diay tandogon si Dr. Salloman sa Vicente Sotto tungod kay ang bag-o niyang hinigugma anak sa usa sa mga banggiitang doktor sa maong ospital.

Sa akong tan-aw, simple ra tingale ang pag-ikyas sa kaso. Tingale, kun moatubang lang si Dr. Salloman sa pamilya sa babaye aron iyang ipasabot nganong dili na siya gustong mopakasal sa babaye unya tabangan niya og pasabot ang ilang mga wedding sponsors ug mga bisita.

Ang pag-atras sa kasal nga ipaagi sa text message dili buhat sa usa ka tiunay nga lalaki.

* * *

Mao tingaleng adunay daghang aksidenteng manghitabo sa Cebu South Coastal tungod sa daghang mga motorista nga walay disiplina.

Makapila na ko makamatikod diha og mga sakyanan – mga SUV ra ba kasagaran – nga kun makapadagan mura og tag-iya sa karsada, dili na lang manumbaling sa mga katapad, giunhan ug gisundan nga mga sakyanan.

Niadtong Sabado, kay hilig lagi ko og motor, akong gigamit ang akong Honda CB-110 samtang nagpaingon ko sa MBF Press Center sa Sudlon, Lahug aron moapil sa eleksiyon sa Board of Directors sa NewsCoop.

Gikan sa Minglanilla, samtang kusog akong padagan sa kurbadahon nga karsada sa San Roque, Talisay paingon sa taytayan nga nag-uwang sa South Road Properties sa siyudad sa Sugbo, takulahaw lang mitunga ang usa ka Toyota Hi-Lux color Gold nga nagtangag sa plaka nga YDD-988.

Ambot kinsay nag-drive niadtong sakyanana. Gikan kini sa SRP paingon sa south, apan mikalit lang og U-Turn pagkatungod niya sa usa ka tindahan og mga sakyanan.

Adunay laing sakyanan ug duha ka motorsiklo nga kusogkusog usab ang dagan nga nakurat sa iyang kalit nga pag-U-turn. Kay kusog lagi akong dagan, naglisod ko sa pag-preno, midil-is ko sa kilid sa karsada, apan mi-pito ko aron mapahibalo ang yabag nga driver sa Toyota Hi-Lux nga adunay mga sakyanan sa kilid niini.

Apan inay ma-alerto, mura’g nasuko hinuon ang karahong driver, gisundan ko niya ug sa dihang hapit na kami motumong sa Sugbu, gipigpigan ko niya, hapit intawon mosaliring sa kilid akong gimanehong motorsiklo.

Mo-aksiyon pa siya og hunong, nagtuo pa ko nga pusilon ko sa driver nga isog kaayo. Mihunong na lang ko aron kopyahon ang iyang plate number, unsa unyay mahitabo kanako.

Akong amigo mitambag nga i-report sa Land Transportation Office akong kasinatian.

Ambot nakahinumdom ba kamo niadtong Septiyembre 2009 nga insidente sa SRP nga gi-harass ko ug akong pamilya sa mga lalaki. Gireklamo ko kadto sa LTO, apan hangtod karon wala gyud ko kahibalo unsa nay nahitabo sa akong reklamo.

Kay dihay hearing nga gipatawag, ang ako ra nga gireklamo ang gipatawag, ako wala gyud.

Inutil!