Midaug nga bidder gihawshiaw

Mopasaka og kaso ang midaug nga bidder sa pag-ayo sa oval sa Cebu City Sports Center tungod kay hangtod karon wa pa i-award ngadto kaniya ang kontrata sa pagtrabaho sa nahisgutang proyekto gumikan kay gusto kining ihatag sa mga gamhanan sa City Hall ngadto sa ilang paborito nga kontraktor nga taga kaulohan. Kini ang akong nasayran gikan sa usa ka kasaligan nga tinubdan.

Matud pa sa akong tinubdan nga kaniadtong miaging buwan gipahigayon ang bidding sa pag-ayo sa naguba na nga oval sa Cebu City Sports Center ug ang kontrata nadaug sa kontraktor nga taga Mandaue City. Ang kontrata nagkantidad og 30 milyones ka pesos ug pagasugdan na unta kini sa pagtrabaho karong buwan sa Mayo apan hangtod karon wa pa mahatag sa dakbayan sa Sugbo ngadto sa kontraktor ang nahisgutang proyekto tungod kay gusto sa mga alipores ni Kongresista Tomas Osmeña diha sa City Hall nga ang kontraktor nga taga kaulohan maoy motrabaho sa proyekto.

Ang kasaligang tinubdan nagkanayon nga ang mga alipores sa kongresista misuway sa paghangyo ngadto sa midaug nga kontraktor nga ang napildi lang nga kontraktor nga ilang paborito ang patrabahoon sa proyekto pero ang ibutang nga pangalan sa kontraktor sa mga dokumento iya lang gihapon. Wa mosugot niini ang midaug nga kontraktor tungod kay kun magkinaunsa ang iyang kompanya ang madaut.         

Gitumbok sa akong kasaligang tinubdan si Bise Mayor Joy Young ug Ricky Ballesteros ang mibraso sa proyekto aron kini mahatag ngadto sa ilang paboritong kontraktor. Unsa ni katinood Mr. Ballesteros? Unsa ni katinood Mr. Vice Mayor?

Kun ugaling tinood ang maong pasangil, unsay nagpaluyo ning tanan? Naka-advance na mo sa inyong commission sa proyekto sa kontraktor nga wa makadaug sa bidding maong inyong ipamugos nga siya gayod ang makakuha sa proyekto bisan pildero sa bidding? Kining ako pangutana lang. Dautan ba kun mangutana ta?