Nahimong sumsoman karon dinhi sa dakbayan sa Sugbo ang balita nga usa ka doktor sa Vicente Sotto Memorial Medical Center (VSMMC) mikanselar sa iyang kaminyoon ngadto sa usa ka medical student bisan og natakda na unta ang petsa sa ilang kasal.
Daghan ang miingon nga dili unta kadto angay’ng himoon ni Dr. Alain James Salloman kay tabla ra nga iyang gipakauwawan ang babaye nga human niya gitanyagan nga pangasaw-on, ug gani natakda na ang ilang kasal, apan wala dayona.
Nahuna-huna man gud nako ang dakung kauwawan nga nahimo ni Dr. Salloman ngadto sa maong medical student nga iyang gipasaligan nga pakaslan unta kaniadtong Marso 19, 2011 apan iyang gibugto.
Sayonan ka kun ang imong anak maoy matumngan niini? Dili kaha ka makahuna-huna og dautan? Dili imposible nga ang babaye nga matumngan ani makahuna-huna nga magpakamatay tungod sa grabeng kauwaw.
Nakapahibalo na ang medical student ngadto sa iyang kabanayan ug kahigalaan nga magminyo na siya. Gani nakakuha na sila og marriage license, naka-seminar na apan sa takulahaw lang giteksan niya ang babaye nga dili na siya modayon sa pakigminyo.
Naunsa baya ka tawon Doc uy, kun maminyo ka unya ang imong anak babaye maoy mahitaboan unsa kaha’y imong bation? Imo unta daan nga gitimbang-timbang Doc kun unsay resulta sa pakigsabut og kaminyoon unya dili dayonon.
Tiaw mo, namaye ka na gani didto sa mga ginikanan sa imong hinigugma nga medical sa Las Piñas City aron imong pangasaw-on. Sa kabuotan sa mga ginikanan sa imong pangasaw-onon unta mitanyag pa sila nga motabang aron dili ka mabug-atan pag-ayo sa gastohan.
Dili sayon ang gidangatan sa medical student kay wala pa gayud nimo tarunga sa pagsulti nga dili na nimo siya dayonon pagpangasawa.
Gipadad-an man lang nimo’g text message nga dili ka na modayon sa gitanyag nimong kaminyoon kay duna ka nay laing babaye nga naibgan? Grabeha usab nimo uy.
Aw katungod man sa usa ka tawo ang pagpili og pangasaw-onon nga ikauban niya sa tibuok kinabuhi. Apan wala unta ka magdali-dali pagpamaye, dayon mikuha na og marriage license.
Maayo unta og karong gipasakaan ka na’g kaso Doc, dili ka lang kaayo maghuna-huna pag-ayo sa imong kaso kay basin apektado ang imong pagpanambal. Gikuyawan ko nga basin maapektahan unya ang imong trabaho ilabi na nga surgery ka ra ba nadistino. Kun apektado gani ang imong panghuna-huna kay gipasakaan ka’g kaso, maayo pa nga mopahuway ka usa Doc.
* * *
Maayo nga sabut ang nakab-ot nila ni Gobernador Gwen Garcia ug Mayor Michael Rama nga buksan ang Larsian access road nga nagdugtong sa Don Mariano Cui paingon sa Fuente Osmeña rotunda, ug bugti niini iuli ang trailer sa Kapitolyo nga gisakmit sa CITOM.
Mao nay gitawag og “win-win” solution. Karon nga gibuksan na ang Larsian road, mapadali na lang ang mga sakyanan nga gikan sa Don Mariano Cui kun moadto sa Fuente Osmeña. Usa g’yud ni sa nakaayo kun ang mga pangulo sa local government units maayo og relasyon. Nasiguro hinoon ko nga makapasamot kini sa kasuko ni Kongresista Tomas Osmeña kang Mike.
Hangtud karon wala gihapon mahilot ang panagsungi nila ni Gwen ug Tommy. Kun ako ang pahatagon og sugyot, gusto ko nga mag-uli na ang maayo nilang kabubut-on.