Ngayon lang nangyaring ang pitak na ito
Ang hindi maganda ay sabihin dito;
May isang kilalang bakeshop sa San Pedro
Sa senior citizens ayaw magdiskwento!
Sa bakeshop na ito – paninda’y masarap
Ang cake at tinapay daming naghahangad;
Marami nang suki at ang ngala’y tanyag
Ngunit walang awa sa mga mahirap!
Madalas na kami dito’y sumasaglit
Kung birthday ni Lola’t apong makukulit;
Pero pag bibilhin ay malaking cake
Wala raw diskwento kay Lolong mabait!
Senior Card ni Lolo laging dala-dala
Sa tuwing bibili sa mga tindera;
Pero ang may discount bitbitin lang pala –
Cake na sinadya di namin makuha!
Ngalan nitong bakeshop sa bansa ay sikat
Dine sa San Pedro ay may dalwang branch;
Dapat ang management ay kumilos agad
Upang mag-diskwento sa cake na pangarap!
Kaya po ang bakeshop ay tinatawagan
Na ang mamimili ay inyong tulungan;
Lalo na ang seniors maikli ang buhay
Sa munting diskwento’y maliligayahan!
Senior card ng senior ipinakikita
Subali’t ang discount hindi rin makuha;
Kahi’t ang binili marami-rami na
Ang discount ng seniors ikinakait pa!
Ito ba ay sanction ng ating gobyerno
Na ang seniors ID balewala rito?
Hindi ba’t sa batas sinasabi nito
Sa mga bibilhin dapat may diskwento?
Sa mga mayama’t mga kakilala
Hindi lang diskwento baka libre pa nga;
Nguni’t pa’no kami na mga seniors na –
Sa konting diskwento namamalimos pa.