Kamatayon ug kinabuhi

Ang kamatayon ingon nga kabahin sa inadlaw’ng pagkinabuhi ang nakahaling gayud og kalisang alang ni bisan kinsang mortal. Kun mahimo pa lang unta, ato kining mapugngan. Kun mahimo pa lang unta makahimo kita og hangyo lubong pangilaba nga unta “Ginoo ayaw lang usa karon! Kun mahimo unya na!” Apan ang kamatayon mahitabo gayud. Hinuon, nahimong atbang o bugti sa kamatayon mao ang kinabuhing dayon. Ang pagkabanhaw ni Lazaro ang nagmatuod nga ang Dios dili Dios sa mga patay kun dili Dios sa mga buhi!”

Buot natong mamahimong immortal. Kun atong pamalandongan ang sugilanon luyo sa mito sa mga drakula ug bampira kini ang naghulagway nga buot diay sa tawo nga magkinabuhi hangtud sa hangtud. Ang pagkabanhaw dili lang usa ka akto diin gibalik ang gininhawa sa usa ka patay kondili ang pagbaton og bag-ong matang sa pagkinabuhi diha sa kahimayaan (Glorified State). Kini nagpasabot nga ingon nga nabanhaw si Jesu-Kristo kita usab ang pagabanhawon. Mao nga imbis kahadlokan ang kamatayon, ato kining pangandaman.

I-kondisyon ang imong hunahuna nga ugmang adlawa ikaw mamatay ug kay mamatay man, ayaw usiki ang matag gutlo sa imong kinabuhi sa mga buhat nga walay hinungdan. Himoang magmabungahon ug magmakahuloganon ang matag adlaw sa imong kinabuhi.