Pusher napordoy tungod sa payola
Kun tinuod ang pamahayag ni Kapitan Jojo Quijano sa Barangay Calamba, duna nay mas epektibo ug garantisado nga paagi pagpuhag sa mga drug pusher. Sigurado gyud nga mohunong ang pusher sa iyang illegal nga negosyo. Mangutana mo og unsa?
Kun si Kapitan Quijano ang atong toohan, matud niya usa ka notadong drug pusher sa iyang barangay ang nihunong na sa iyang negosyo. Wala siya dakpa sa kapolisan, gani gipasagdan siya sa iyang operasyon nga nagpahimulos pa sa proteksiyon sa kapolisan.
Apan bisan niini napugos ang maong drug pusher paghunong sa iyang negosyo. Bugtong gihimo ra sa kapolisan mao ang pagpunay og pangilkil niya matag semana.
Sa kadaghan sa mga sakop sa kapolisan ug sa operating unit sa kapolisan nga magpangayoan og kwarta sa maong drug pusher, matud ni Quijano nga napordoy ang maong pusher.
Tiaw mo bay labing minus kuno nga pangayoon sa matag pulis nga moadto niining maong pusher P5 mil. Unya kada semana ang pagpangayo, paminaw ko hasta ang mga party sa iyang mga protectors siya maoy mogasto, napordoy gyud sa kadugayan ang maong pusher.
Matud ni Quijano nga ang inahan sa maong pusher maoy misulti niya nga gawas nga napordoy nahurot pa gyud ang tanang napundar niini nga kabutangan og embargo sa drug lord nga maoy nag-supply niya og drugas kay wala na man siya kabayad sa iyang utang. Ambot og angayan ba tang malipay sa maong kasayuran. Siguro malipay ta nga nihunong na ang pusher sa iyang illegal nga negosyo apan masubo sab ta sa samang higayon tungod sa kamatuoran nga ang pagkuyanap sa suliran sa drugas sa atong dapit nahitabo tungod sa proteksiyon nga gihatag sa mga sakop ra pud sa kapolisan.
Maayo gani kay napordoy ang maong pusher, apan pila man kaha ang wala mapordoy ug nilambo og maayo ang negosyo tungod sa proteksiyon nga gihatag sa mga kurakot nga sakop sa kapolisan?
* * *
Ang British national nga si Ian Charles Griffiths kinsa lakip sa nag-atubang og reklamo sa piskaliya tungod sa giingong kalambigitan sa pagdagit ug pagpatay sa 6-anyos nga si Ellah Joy Pique tataw nga wala na mobalik sa Pilipinas aron pagsibat sa kaso.
Iyang gipapauli dinhi sa Sugbo ang iyang hinigugma nga si Bella Ruby Santos aron maoy moasikaso sa ilang kaso. Apan mas una pa hinuon siyang napriso kay sa iyang hinigugma. Si Griffiths nadakpan didto sa London sa United Kingdom tungod sa iyang kalambigitan sa kaso dinhi sa Sugbo. Nalimtan tingali ni Griffiths nga mas istrikto ilang balaud didto kay sa dinhi sa Pilipinas.
Didto sa UK kun mahibaw-an nga dunay kaso ang ilang citizen sa laing nasud mamahimo nilang dakpon. Mao ni ang nahitabo ni Griffiths. Samtang ang iyang hinigugma nga si Santos libre pa kaayo nga nagsuroy-suroy dinhi sa Sugbo tungod kay wala pay kaso nga napasaka batok niya didto sa korte. Gani daw celebrity si Santos kun moatubang sa media. Manghagit pa og sinumbagay sa kapolisan.
* * *
- Latest
- Trending
