Saan ba hahantong labanan sa Libya
bakit nagkagulo ay kay yamang bansa?
May mina ng langis ang tao’y sagana
kaya nga ang gulo’y nakapagtataka?
Pangulong Kadhafi tagal na sa pwesto
sobra na sa edad dapat magretiro;
Kanyang paghahari mahaba na ito –
kaya kababayan ngayo’y nag-alburo!
Kung matagal ka na sa panunungkulan
kahi’t na magaling ay may katapusan;
At ito ang aral na di natutuhan
nitong si Kadhafi sa pwesto’y sige lang!
Dati lang sa Libya umiral ang saya
dahil dati naman may pagkakaisa;
Subali’t nadamang sila ay api na
kung kaya lumaban at biglang nag-alsa!
Kaya ito’y aral sa maramng lider
ang pwesto sa bansa’y huwag sosolohin;
Kung matagal ka na sa iyong tungkulin
ang pamamahala’y dapat ihabilin!
Sana ay igalang nitong si Kadhafi
ang hangad ng UN Libya’y mapabuti;
Pagdanak ng dugo – rebelde’t kakampi
sa bansang tahimik hindi manyayari!
Bansang kaalyado ng US at UK –
kumikilos ngayon Libya’y palayain;
Fortress ni Kadhafi target na bombahin
upang bumaba na’t siya’y payapain1
Kung ayaw sumuko’y kasalanan niya
kanyang kababayan baka maubos pa;
Sa tagal sa pwesto siya’y bayani na
sa dakilang tao iyan ay maganda!
Katulad ng buhay na tanging pahiram
ito’y kinukuha ng Poong Lumalang;
Pagsapit sa takda ng ‘yong kapalaran
maglalaho ka rin sa sandaigdigan!