Kinahanglanon ba ang police outpost?

Gumikan sa kalisod og kapait sa panginabuhi karon, midagsang ang tulis ug kawat sa kabtangan sa atong mga katawhan.

Gani, dili pa dugay nga gipusil-patay si PO1 William Mangubat sa tulisan nga iyang gilutos diha sa Mananga, Tabunok, Talisay City.

Naunhan siya sa pagpusil sa tulisan nga hangtod karon gipangita pa sa atong mga otoridad. Makaingon kita nga isog na kaayo karong panahona ang mga kriminal bisan polis nga usa ka otoridad ihawom lang sa walay pupanagana ug kukahadlok.

Unsaon man nato pagsumpo kining mga hitaboa? Kinahanglanon ba ang ‘police outpost’ sa mga ngitngit og mga delikadong lugar sa atong dapit?

Ang tubag niini mao nga kinahanglanon gyod kaayo ang police outpost kay magduhaduha ug magpanagana ang usa ka kriminal sa paghimo og salaod kay madakpan man dayon siya.

Malisod gyod sa usa ka kriminal ang paghimo og krimen kun aduna siyay makita nga unipormado nga otoridad nga magtikawtikaw sa usa ka lugar o dapit.

Dili nato kalimtan ang panultihon sa iningles pa nga ‘when the cat is away the mouse will play’.

Ikaduha, aron usab sa pagpaminos sa krimen kinahanglan nga adunay ‘police visibility’ matag karon ug unya nga makita ang atong mga katawhan dili lang dinhi sa Sugbo lakip na usab sa nagkalain-laing dapit sa atong nasud.

Ang buot ipasabot sa police visibility mao nga kinahanglan ang kuwerpo sa atong kapolisan mohimo gyod og ‘roving patrol’ sa atong mga kadalanan adlaw ug gabiing tanan.

Kun matuman kini, mominos gyod ang kriminalidad sa atong katilingban nga maoy usa sa mga hinungdan sa mga foreign investors sa pagbubo og igong capital dinhi sa atong nasud.

Di ba, husto?