Pagkadakung kataw-anan kay ang barangay nga gidumala sa kapitan nga ig-agaw ni Mayor Michael Rama wala man dayon makatuman sa gimando sa mayor nga segregation sa mga basura.
Dihang gisugdan na sa dakbayan sa Sugbo ang pagpatuman sa pagdili pagdawat sa mga unsegregated nga mga basura didto sa Inayawan Sanitary Landfill niadtong Biyernes, apil ang barangay Basak-San Nicolas nga gibalibaran.
Pastilan, kaming mga sakop sa media halos dili makatoo kay si Kapitan George Rama naa man pirmi sa City Hall sa opisina sa mayor ug imposible nga wala siya masayud sa bag-ong pamaagi sa iyang ig-agaw nga mayor.
Gawas ni Kapitan Rama, daghan pang mga kapitan ang wala makatuman sa pag-segregate sa ilang mga basura, lainon kadtong madugta gikan sa mga basura nga dili madugta.
Awhag nako sa mga opisyal sa kabarangayan nga dakpa g’yud ninyo kadtong mga molabay og basura nga wala gi-segregate. Kun lugak-lugakan gud ninyo ang pagpatuman sa balaud, masubli ang palpak nga pagpatuman nga gihimo kaniadtong 2004.
* * *
Dunay ubang mga tawo nga misugyot nga kay gipatay man g’yud sa China ang tulo nato ka igsoong Filipino nga nadakpan didto sa ilang nasud nga giingong nagpayuhot og illegal nga drugas, ingon usab niini ang buhaton nato sa mga Insik nga napriso dinhi sa nasud.
Ang ilang gipasabot mao kadtong mga Insik nga nadakpan sa pagpayuhot og gidiling matang sa drugas, ilabi na kadtong mga nadakpan nga nanghimo og shabu sa usa ka laboratoryo diha sa dakbayan sa Mandaue.
Pabor ko sa maong sugyot. Apan ang nakaproblema mao nga dili kini nato mahimo. Unsaon nga ang inyong “iyaan” nga si kanhi Presidente Arroyo ug ang mga magbabalaud nagtinabangay man aron ma-repeal ang death penalty.
Kadtong mga tawo nga supak sa death penalty wala magkwenta kun pila ka milyon ka pesos ang gastohon sa nasud sa padayon nato nga pagtipig niining mga kriminal.
Mahimong daghan tingali ang masuko nako sa akong baruganan apan angay ba gud nga buhion pa kining mga tawo nga namatud-ang sad-an paglugos sa ilang mga anak-babaye? Kining mga rapist?
Angay ba gud nga buhion pa kining mga tawo nga walay kukalooy nga mipatay sa kauban nila nga mga binuhat sa Dios? Tinuod ang Ginoo ra maoy may katungod sa pagkutlo sa atong kinabuhi, apan tan-awa ang resulta.
Ang pagtipig nato niining maong mga “convicts” usa sa nakapaut-ot sa atong panudlanan kay tiaw mo nga sa kaon lang niining maong mga convicts mogasto og minilyon?
Ang budget sa pagkaon sa maong mga convicts mahimo na unta nga gastohon sa lainlaing mga proyekto nga kapahimuslan sa kinabag-ang katawhan.
Ang nakanindot didto sa China kay paspas ang paghusay nila sa mga kaso dili sama dinhi sa ato nga pwerteng langaya.
* * *
Pahimudsan nako ang pag-awhag sa mga driver og public utility vehicles ha, mga bus, taxi ug PUJ nga tumana ninyo ang gimando sa LTFRB nga uniporme alang kaninyo.
Puti nga polo o T-shirt nga dunay kwelyo alang sa mga drayber ug bus ug taxi, ug blue nga polo o T-shirt nga may kwelyo sa mga drayber og PUJ.
Unya, timan-i, gisugdan na namo sa LTO Task Force Alpha ang pagpanakop sa mga drayber nga magpadagan sa ilang sakyanan nga dili magsuga panahon sa gabii.
Basin og nagtoo ra kamo nga kay mosiga man ang inyong suga human kamo mapara dili na kamo madakpan, diha kamo masayop. Ang pag-drive og sakyanan nga dili magpasiga sa suga panahon sa gabii usa ka “reckless driving” kay nagdapit kini og aksidente.