No Merci

Si Ma. Merceditas Navarro Gutierrez maoy unang babaye nga nahimong hepe sa Office of the Ombudsman.

Gradwado siya sa Ateneo de Manila University Law School sa tuig 1972, diin siya schoolmate ni umaabut niadto’ng First Gentleman Mike Arroyo.

Sa tuig 1983, nagsugod siya sa pag-serbisyo sa gobiyerno. Nahimo siya’ng Legal Officer sa Philippine Aerospace Development Corporation (PADC), unya, nahimo’ng Legal Officer sa Philippine Presidential Office. Human niini, gibalhin siya sa Presidente ngadto sa National Economic and Development Authority (NEDA).

Sa duha ka managlahi nga panahon, gitudlo siya ni Pres. Arroyo nga Acting Justice Secretary aron sa paghulip sa nabakante’ng pwesto ni Sec. Hernani Perez sa tuig 2002 ug ni Sec. Simeon Datumanong sa tuig 2004.

Sa Deciembre 1, 2005, gitudlo siya ni Arroyo sa pagka-Ombudsman.

Niadtong Marso 2009, si kanhi Senate President Jovito Salonga uban sa civil society groups ni-file og impeachnment charges batok kaniya apan na-dismiss kini.

Sa Hulyo 22, 2010, usa ka bag-ong impeachment complaint ang gi-file batok kaniya nila ni Riza Hontiveros-Baraquel, Brig. Gen. Danilo Lim ug Evelyn Pestaño,

Niadtong Agosto 2010, lain usab nga impeachment complaint ang gisang-at sa Bagong Alyansang Makabayan (BAYAN).

Sa Marso 22, 2011, ang mga kongresista ni-botar nga i-impeach siya sa botos nga 210 ang uyon, 46 ang supak ug upat ang ni-abstain.

Ang articles of impeachment giduso na karon sa Senado nga ang mga sakop niini maoy mahimong mga maghuhukom ug panguluhan kini sa Chief Justice sa Supreme Court. Gikatakda nga sugdan pagdungog ang impeachment karong sunod buwan.

* * *

Samtang adunay mga pasangil nga gihaylo kuno nga i-release dayon ang pork barrel sa mga kongresista nga mobotar sa pag-impeach kang Gurierrez, ako nagtoo nga ang mga nibotar nagsunod sa baruganan sa ilang partido.

Ang mga independente’ng kongresista nahadlok sa kalagot sa katawhan nga maoy mohusgar kanila sa umaabut nga eleksiyon.

Nasayud na man gud sila’ng daan nga ang public opinion buot gayud nga matangtang si Gutierrez. Gi-kompirmar kini sa survey sa SWS.

Apan unsa man ang hukom unya sa mga senador? Tuguti nga mohimo ako’g pangagpas sa ilang baruganan.

Ang mopabor sa pagtangtang kang Ombudsman Gutierrez mao sila si Drilon, Escudero, Pangilinan, Estrada, Biazon, Trillanes, Recto, Osmeña ug Lacson.

Mopaluyo kaniya mao sila si Revilla, Lapid, Sotto, Marcos ug Zubiri.

Ang mga wa pay klaro og baruganan kon swing votes mao sila si Enrile, Honasan, Santiago, Joker Arroyo, Peter Cayetano, Pia Cayetano, Legarda, Angara ug Villar.

Nagkinahanglan og two-thirds votes (16 botos) sa mga senador aron ma-impeach si Gutierrez. Unsa man ang inyong tagna, Mercy or no Merci?

* * *

Sa laing bahin, mahimo nang sugdan ang pag-recall, for loss of confidence, sa mga elected officials sa probinsiya, siyudad, distrito ug munisipyo karong Hulyo 1.

Mahimo kining pasiugdahan sa preparatory recall assembly o kaha sa 25 por ciento sa mga registered voters sa dapit diin mahisakop ang hingtungdan nga opisyal nga buot ipa-recall.

Dinhi sa Cebu city, ang sakop sa preparatory recall assembly mao ang tanang mga barangay kapitan ug mga barangay konsehal.

Ang mayoriya sa mga sakop sa preparatory recall assembly ang magtigum alang sa tumong ug tuyo nga pagbotar sa isyu nga loss of confidence,

Ang recall sa usa ka elected official mahimo’ng sugdan pinaagi sa pagpaluyo sa mayoriya sa preparatory recall assembly.

Ang incumbent official nga buot ipa-recall dili na maka-resign ug siya automatic nga registered candidate sa mao gihapong pwesto nga iyang gihuptan.

Aduna usay laing mga kandidato nga kwalipikado nga mo-atbang kaniya sa usa ka piniliay nga dumalahon ug gastuhan sa Comelec.

Kun modaug ang incumbent official magpadayon siya sa iyang termino apan ilisdan siya sa iyang kaatbang nga maoy makakuha sa labing taas nga botos. Pangandam na Mayor Mike.

* * *

Unsaon man ni Mayor Mike ang paglibkas sa moratorium sa development sa Banilad-Talamban area?

Nasayud kita nga nahimo kining moratorium tungod sa panagbangi nila ni Kong.Tom ug Gob. Gwen.

Angayang mahibaw-an nga usa ka resolusyon ang nagbuot niini busa kinahanglan kining ilibkas sa mga sakop sa Cebu city council nga ang mayoriya mga sakop sa BO-PK ni Kong. Tom.

Buot ba’ng ipatoo ni Mayor Mike nga makombinsi niya ang mayoriya sa mga konsehal? Too good to be true!

* * *

Panahon karon sa graduation ug recognition rites sa mga estudyante sa nagkalainlaing tunghaan, kolihiyo ug unibersidad.

Tuguti nga akong pahalipayan ang anak sa akong anak, Kyrone Dominic R. Magadia, nga maoy First Honor sa Grade one sa Morning Dew Montessori sa kauluhan.

Awardee usab siya sa Excellence in English, Math, Science and Leadership. Of course, proud ang grandparents.

Email: [email protected]