Sa iyang pagbalik

Migawas na gyod sa lungag nga iyang gitagoan ang nagtago-tago nga si Senador Ping Lacson. Human sa usa ka tuig kapin nga pagtago mipakita na sa katawhan ang Senador nga mitago tungod kay mahadlok nga dakpon tungod sa kasong duha ka murder nga iyang giatubang sa husgado.

Gikan sa Hong Kong mitugpa sa Mactan Cebu International Airport ang abyon nga gisakyan sa Senador alas 11:48 sa buntag kaniadtong adlaw’ng Sabado petsa 26 ning buwana. Apan sa iyang pagtugpa tagolilong gihapon ang Senador. Kalit lang siyang nahanaw sa panan-aw sa katawhan ug mga sakop sa media nga nakamatikod sa iyang pag-abot. Hinoon mopakita ra siya apan didto na sa kaulohan.

Ning iyang pagbalik labing seguro iyang itug-an o ba kaha iyang ilimod sa katawhan ang dapit nga iyang gitagoan. Labing seguro iyang itug-an o ilimod sa katawhan ang tinuoray nga hinungdan sa iyang pagtago bisan tuod og ato nang nahibaw-an nga mitago siya tungod kay gilutos siya sa kagamhanan kaniadto ni Gloria Macapagal Arroyo.

Ang Senador nga nagtago segurista ug naniguro sa iyang kaugalingon nga dili gayod madakop sa iyang pagpakita. Bisan og gibasura na sa Court of Appeals ang kaso nga iyang giatubang, wa gyod kini mopakita hangtod nga iyang naseguro ang pagbasura sa warrant of arrest nga gipagawas batok kaniya.

Sa iyang pagbalik madugangan na usab ang kalbaryo ni Ombudsman Merceditas Gutierrez tungod kay bisan man tuod og nagkasabot na ang mga Senador nga ilang hukman ang Ombudsman pinaagi sa ilang konsensiya ug dili sa partido diin sila nahisakop apan klaro na kaayo nga boto si Lacson sa pagpalagpot sa kontrobersiyal nga Ombudsman.

Sa iyang pagbalik di na kaha siya mahanaw.

Ako diay nga i-congratulate si Senador Lacson tungod kay iyang nasunod ang gitudlo sa iyang mistah nga si Senador Honasan ang maayong taktika sa pagtago. Ako usab nga isingit sa pag-congratulate si Gobernador Gwendolyn Garcia kay miingon man siya nga siya kuno ang pinakamaayong gobernador nga nahimo sa lalawigan sa Sugbo.