Human sa pipila ka semana nga pagka-postpone, mahitabo na gayud ang pagbitay sa tulo ka Pilipino nga nabilanggo didto sa nasud sa China gumikan sa drug trafficking. Sa taho nga gipagawas sa Chinese government sa niaging Huwebes, madayon gayud ang pagbitay sa tulo karong Miyerkules, March 30.
Ang death penalty ipahamtang ngadto kang Ramon Credo ug Sally Villanueva didto sa siyudad sa Xiamen, samtang si Elizabeth Batain adto bitayon sa dakbayan sa Shenzhen.
Hinuon gipadad-an na ang mga pamilya sa maong mga Pinoy og inpormasyon mahitungod sa pagbitay gikan sa Chinese government. Kalit kini nga panghitabo ug wala gayud magdahum ang mga pamilya niining mga bitayonon nga ipahamtang na gayud ang silot.
Sa akong pagsulat niini, gikataho nga mobalik si Bise Presidente Jejomay Binay ngadto sa China aron pagkumbinse sa kagamhanan didto nga iuktaba una ang pagbitay sa tulo. Pero agta ray nasayod kun makumbinse ba, sa ikaduhang higayon, ang Chinese government nga i-postpone na usab ang maong pagbitay.
Kahinumdoman nga sa niaging bulan, malampuson si Binay sa iyang misyon paghangyo sa Chinese government pag-uktaba sa pagbitay sa tulo ka Pilipino. Daghan ang nalipay niadto, ilabina ang mga pamilya sa maong mga konbiktado dinhi sa Pilipinas.
Apan niining bag-o nga taho nga padayon na gayud ang pagpahamtang sa silot nga kamatayon sa mga drug convicts, morag nagkadulom na ang kahigayonan nga masalbar pa sila gikan sa death row.
Tungod niini, nawad-an na’g paglaum ang mga pamilya sa mga konbiktado. Ila na lamang isandig ngadto sa kahitas-an ang kun unsay dangatan sa ilang mga mahal sa kinabuhi.
Kun dili na gayud mahangyo pa ang kagamhanan sa China pag-postpone pag-usab sa pagbitay sa tulo ka konbiktadong Pilipino, wala na gayuy mahimo ang kagamhanan sa Pilipinas. Ato na lamang respetohan ang desisyon sa korte sa maong nasud.
Sa akong pangagpas, lisod nang makumbinse pa ang kagamhanan sa China pag-postpone sa maong execution. Ato nang nasayran nga lig-on gayud ang baroganan sa maong nasud.
Gani daghang gipangbitay niini nga mga foreign nationals sa nagkalain-laing sala bisan pa man sa mga apela sa mga gobiyerno sa maong mga konbiktado pagpasaylo na lamang nila.
Tungod lagi sa ka estrikto sa China pagpahamtang sa death penalty, dili gayud kini matarug sa bisan unsa mang apela gikan ni bisan kinsa. Gani wala kini matandog sa gibuhat ni Presidente Benigno Aquino nga wala pagtambong sa Nobel Award ceremony, diin usa ka Chinese maoy Peace Prize awardee, aron lagi mapasaylo ang tulo ka mga Pilipinong konbiktado.
Karon nga madayon gayud ang pagbitay sa tulo, igo na lamang kita nga moyuko pag-surender sa tanan ngadto sa kahitas-an, nga unta buligan niini ang mga pamilya sa maong mga drug convicts.
Hinuon ang ilang gidangatan magsilbe unta nga leksiyon alang niadtong buot gustong makasapi og daling kwarta pinaagi sa ilegal nga trabaho. Apan hinaut nga kini na ang katapusan nga execution sa mga Pilipino didto sa laing nasud gumikan sa illegal nga binuhatan.
* * *
Email: yacilam@yahoo.com