Paghiwa sa Libya

Ang kabalaka nga way klarong liderato ang mga nasud nga nibarug batok ni Muammar Gaddafi sa Libya ug nga siyam-siyaman ta og paabot kanus-a malusad ang air strikes batok sa air force nga gigamit pag-ihaw sa iyang kaugalingong katawhan, ang Pransiya unang nipalupad sa iyang mga ayroplanong iggugubat ug pormal nga nisugod sa labing dakong pasundayag sa puwersang militar sukad sa gubat sa Iraq tangkod nga walo ka tuig ang nilabay.

 Human moinsistir ang Estados Unidos nga di silay mangu ug igo lang motabang sa kampanya batok ni Gaddafi, si French President Nicolas Sarkozy nakigtagbo sa mga lider sa alyadong mga nasud aron pagtugot sa operation “Odyssey Dawn” ug gipapas ang tanang pagduda nga nanakod nila ang panagana ni US President Barack Obama.

* * *

Ang pasiunang air strikes sa Pransiya gisundan sa pagbombardiyo sa mga barkong iggugubat ug mga submarino sa Estados Unidos ug Britanya ug labing menos 110 ka scud missiles nga niinutil sa air defenses ni Gaddafi sa Tripoli ug Misrata. Nitabang sab ang mga ayroplanong iggugubat sa Canada ug Italya.

 Bisan gisubli pagtataw ni Obama nga way ground troops nga ipakatap batok ni Gaddafi, ang iyang mga opisyal sa militar niingon nga ang duha ka sunudsunod nga bombardiyo pasiuna pa lang sa hiningusgang kampanya pagtangtang sa katakos ni Gaddafi pagpatay sa inosenteng mga sibilyan.

* * *

Determinado si Obama sa pagsangyaw sa tibuok kalibotan nga di ang Estados Unidos maoy nangu sa pagpangatake sa Libya human sa nabulilyasong mga gubat nga ilang gisugdan sa Iraq ug Afghanistan. Maong bisan sa UN Security Council, ang Pransiya ug Britanya maoy nangusog pag-ayo sa pag-awhag nga ipatuman ang no fly zone sa Libya.

Niinsistir sab si Obama, ug mabantang ni sa mosunod nga mga adlaw, nga mohupot og mas dakong papel sa gubat ang Arabong mga nasud. Gawas sa pagtampo og puwersang militar, gipaabot nga motabang sa dakong gasto ang Saudi Arabia, Qatar, United Arab Emirates ug Egypt.

* * *

Mora nang irong buang si Gaddafi nga nagsige og tiyabaw nga gilapas sa langyaw’ng mga puwersa ang teritoryo sa iyang nasud. Human giluba ang iyang kaugalingong katawhan, karon nagbuwa na sang iyang baba pagpasangil nga nakalapas sa balaod ang mga nibadlong niya.

Apan mahimo si Gaddafi nga mopilit morang kumi sa iyang nahimutangan. Nga gikahadlokang mosangpot sa pagkahiwa sa Libya ngadto sa duha—tali sa Benghazi ug ubang bahin sa silangan nga giduma sa mga rebelde ug sa Tripoli ug ubang bahin sa kasadpan nga gikontrolar pang Gaddafi. Bisan inutil nang iyang air force, makapanghasi gihapon si Gaddafi sa mga sibilyan pinaagi sa iyang ground troops. Nga di na epektibong mabadlong sa air strikes 15,000 ka tiil gikan sa ibabaw.

* * *

Email: [email protected]