Ang Bar

Gamay ra gihapon ang mga nakapasar sa miaging 2010 nga Bar Examinations. Sa kapin sa upat ka libo ka mga gradwado sa kursong abogasya nga gustong mag abogado 982 lamang kanila ang nakapasar o biyente (20) porsyento. Gani kun wala pa binata sa Korte Suprema ang porsyento sa mga makapasar anaa ra unta kuno sa siengko (5) porsyento ang makapasar.

Ngano kahang kanunay ra mang gamay ang makapasar sa Bar Examinations. Tungod ba sa kalisod gayod sa maong eksaminasyon o tungod ba kaha kay ubos ang kalidad sa instructions sa mga Law Schools sa nasud?

Ang Bar examination sukdanan ug maoy basihanan sa pinakataas nga hukmanan sa nasud sa ilang pag-ila kun si kinsa kadtong ilang tugotan nga makapanglaban, busa ang mga examinees hatagan unta og eksaminasyon nga gibasi sa ilang nahibaw-an ug dili sa wa nila mahibaw-i.

Hinoon niining umaabot nga 2011 Bar Examination ang Korte Suprema mipatuman og kausaban sa matang sa eksaminasyon nga ihatag ngadto sa mga gustong mag abogado.

Sugod ning tuiga, ang 60 porsyento sa eksaminasyon kay multiple choice na samtang ang kwarenta (40) porsyento memorandum making ug legal opinion making.

Giusab na usab sa Korte Suprema ang skedyul sa eksaminasyon. Gikan sa buwan sa Septyembre gibalhin na kini ngadto sa buwan sa Nobembre. Adto na usab ipahigayon ang Bar Examination sa University of Santo Tomas ug dili na sa naandang De Lasalle University.     

Hinaut pa unta nga ning gipatumang kausaban sa Bar Examination motaas na unta ang gidaghanon sa makapasar.