EDITORYAL - Ang pag-reclaim sa Cordova

Ang isyu bahin sa pag-reclaim sa lungsod sa Cordova giilogan na karon ni Kongresista Tomas Osmeña ug ni Gobernador Gwendolyn Garcia ug ang pagtumbok kun kinsa may labaw og katungod nga mopahigayon sa maong proyekto, mao ni ang angayang husayon.

Sa pagkakaron, ang   lungsod sa Cordova, usa ka tipik sa lalawigan sa Sugbo, busa may hurisdiksyon niini ang gobernador.

Sa bahin ni Kongresista Osmeña, mao ra og sagkaon ang iyang laraw kun siyay mangunay sa pag-abuno sa dagat sa Cordova aron itapot ug idugtong sa dakbayan sa Sugbo.

Kini tungod kay di tapi sa dakbayan sa Sugbo ang Cordova ug di usab ubos sa iyang hurisdikyon ni Osmeña sa habagatang distrito sa dakbayan sa Sugbo.

Sa iyang laraw nga ipasakop sa dakbayan sa Sugbo ang Cordova, ambot kun mosaler ba kaha kini kay mag-agad man kini sa pulso sa mga opisyal sa lungsod ug sa mga molupyo niini.

Sama ra usab kini sa lungsod sa Balamban nga dihang nakita sa kongresista   ang dakong pabrika sa barko sa maong lungsod nagkisi-kisi siya nga itapi kini sa dakbayan sa Sugbo bisan sa kalayong suwad niini gikan sa dakbayan.

Usa sa mga hinungdan nga wa mosaler ang iyang plano sa Balamban, tungod kay may lig-on nang mga opisyal ang maong lungsod nga makaantigo sa pagpadagan sa ilang ekonomiya ug kun mosugot sila nga mahimo silang sakop sa dakbayan sa Sugbo, mahimo nalang silang barangay ug ang mayor usa nalang ka kapitan sa barangay.

Ingon usab niini ang Cordova, kun mahimong tipik sa dakbayan sa Sugbo, mahimo na siyang usa ka barangay Cordova, ug ang kapitan way lain kundi si Kapitan Adelino Sitoy. Di ba?