Kaayuhan sa "no fly zone"

Nagsugod na ang pag-atake sa Estados Unidos ug sa mga alyado niini ngadto sa Libya human giaprobahan sa United Nations ang resolusyon nga magpatuman sa no-fly zone sa maong gubot nga nasud.

Ang kagamhanan sa Libya nga padayong gigunitan sa rehimen sa padayong nagmagahi nga si Moamer Kadhafi na-pressure karon sa sunod-sunod nga pangatake.

Ang mga nasud nga sakop sa UN nabalaka na sa sunodsunod nga pagpangatake sa rehimen ni Kadhafi ngadto sa mga lugar kung asa naghimo og kota ang mga rebelde. Sumala sa report nga ang maong mga pagpangatake walay pili, bisan nangadamay pa ang mga sibilyan.

Sumala sa atong Department of Foreign Affairs nga ang atong nasud nga Pilipinas mi-uyon sa UN resolution nga nagpatuman og no-fly zone sa Libya.

Ang DFA nagkanayon sa report sa Philippine News Agency nga ang Pilipinas signatory man sa kasabutan nga naghimo sa UN, busa obligado kini nga mouyon sa mga resolusyon niini nga maghatag og kaayohan sa mga member states.

Ang pagpatuman og no-fly zone sa Libya nakita nga makaayo sa mga sibilyan sa maong nasud nga napiit na pag-ayo tungod sa pagpamagahi og kanaog ni Kadhafi bisan mayoriya na sa mga tawo didto ang nangayo og demokrasya gikan sa hagip-ot nga rehimen mugna sa diktadoriya niyang dinad-an.

Maisip nga usa ka maayong solusyon ang pag-atake sa rehimen ni Kadhafi tungod sa pagkapiit na lakip sa mga nagkalainlaing langyaw sa maong nasud, nga naglakip sa mga Pilipino nga walay piling gipanggukod ug gipang-atake sa pro-Kadhafi troops, ilabi na sa Benghazi.

Kay wala man kitay tropa nga ikapadala aron mo-apil sa mga allied forces nga mo-atake sa Libya, mamati na lang kita unsay dangatan sa rehimeng Kadhafi, dala ang pamasin nga makahatag kini og kaayuhan sa mga nasud nga sama sa Pilipinas nagsalig lamang og suplay sa lana sa gawas sa nasud.

Sa dihang misugod og kadako ang kagubot sa Libya, misaka pag-ayo ang presyo sa mga oil products dinhi sa Pilipinas.

Kun wala ko masayop, P41 pa ang diesel niadtong nagsugod ang kagubot sa mga nasud sa Middle East ug North Africa nga nagsugod sa nasud nga Tunisia.

Usa sa mga nasud nga gikuhaan og lana nga gihimong diesel ug gasolina dinhi sa nasud mao ang Libya.

Sumala sa akong nadunggan nga nagsugod og suplay ang Libya dinhi sa Pilipinas sa dihang nadungog kaniadto nga si Kadhafi ug kanhi unang ginang ug karon Kongresista Imelda Marcos nagka-uyab (kuno).

Kaniadto barato kaayo ang atong mga oil products tungod sa interventions ni Imelda, apan sa dihang nawagtang na ang gahum sa mga Marcos human sa 1986 people power sa Edsa, misaka og anam-anam ang presyo sa mga produktong petrolyo.

Pero mi-uyon ko sa panahom sa uban nga bahala na lang og mahal-mahal og diyotay ang atong mga petroleum products basta dili lang kita mapa-ilawom sa diktadoriyang gobyerno.

Ang ato lang karon mao nga mabalik sa gobyerno ang pagkontrolar sa industriya sa petrolyo sa nasud tungod sa abuso nga atong nakita sa mga oil companies.

Bisan ang atong mga opisyal sa gobyerno nakakita na og mga tilimad-on nga angayan na gyud i-repel ang Oil Deregulation Law, apan ang kagamhanan sa mga higanteng kompaniya sa lana, dili gyud magsilbe ang panawagan nga ibasura kini.

Hinuon, walay imposible niining tanan. Sa akong paminaw, sekretong gitun-an sa pamunoan ni Pres. Benigno Simeon Aquino III ang mga pamaagi nga mabalik sa kagamhanan sa nasud ang pag-regulate sa oil industry.

Kini, bisan (sumala sa mga estorya nga atong nadunggan) ang mga higanteng kompaniya sa lana giingong usa sa mga sekretong donor sa campaign funds.

Dili lang tingale kita mohunong hangtod ang gobyerno makakita sa nagkamang nga mga Pilipino tungod sa dili “stable” nga oil price nga makadaot sa ekonomiya.

* * *

Akong awhagon kadtong nanagbuhi ug kadtong gustong mamuhi og kanding ug karnero sa pag-apil sa Goat Conference: “Programa sa Panginabuhi ug Kahimsog” nga anha ipahigayon sa Talisay People’s Hall karong Marso 25, 2011, adlaw’ng Biyernes.

Kining maong Goat Conference gilusad kini sa Cebu Goat and Sheep Raisers Association, Inc. ug sa District Office ni Rep. Eduardo Gullas.

Gihimo kini aron kadtong namuhi ug gusto kaayong mamuhi og kanding ug karnero makakat-on sa mga hustong pamaagi sa pagpamuhi sa maong hayopan, lakip na ang pagpili og maayong breed, pagpakaon, pagtambal sa sakit niini ug ang mga produkto niini gikan sa karne ug gatas. Ang gatas sa kanding mahimong himuon og sabon, losyon ug cheese.

Mga eksperto sa panganding gikan sa Department of Agriculture regional field unit 7 ug dagkong goat breeder didto sa Luzon ang giimbitar aron mo-lecture sa maong conference.

Alang sa buot motambong sa maong conference, mahimo kamong motawag sa telepono 272-8616 pangitaa sa Ed Durango sa Pardo-Inayawan-Talisay area; Mando o Emem sa 268-3212 o 268-9802 ug 268-2313 sa DA-7 alang sa Mandaue-Consolacion-Lapulapu-Cordova area; sa Minglanilla-Naga-San Fernando-Carcar-Sibonga area mahimong maka-text ni Louie Sanchez sa 0917-3215865; o ni Blanche sa Cebu City area sa telepono 316-0890.

Adunay P400 nga registration alang sa dili mga LGU-beneficiary participants sa maong conference, libre na niini ang paniudto, duha ka snacks ug mga materials sa maong conference.

Adunay mga hybrid nga kanding nga ipa-raffle sa maong conference.

Kita-kita nya ta didto ha!