Ang disiplina sa mga Hapon

Bisan og nagkrisis ang nasud sa Japan ila gihapong gipakita ngadto sa kalibutan unsa sila ka disiplinado ug ka positibo.

Sa taho ni Chino Gaston sa 24 Oras nga atoa karon didto sa Sendai, Japan ug sigun usab sa photage nga iyang gipadala atong nakita nga wa gyoy nangawat sa baligya sa mga tindahan didto sa Japan bisan og wala nay nagbantay. Ang mga baligya anaa gihapon, wa gyod matandog. Dinhi pa kaha to sa Pilipinas hasta seguro ang tindahan giaswat na ug giapil sa pagkawat. Ang mga hapon nagtoo usab nga makabangon ra sila sa ilang nasinating krisis.   

Tungod niini akong gidayeg ug gisaludohan ang ilang pagkadisiplinado ug pagkapositibo sa ilang panglantaw. Maayo og ingon ani unta ang mga Pinoy. Sa ilang disiplina ug pagkapositibo atong nakita kun giunsa nila pagbangon gikan sa pagkapukan niadtong ikaduhang gubat sa kalibutan. Gani bisan og nagbayad sila sa danyos sa mga kadaot nga ilang nahimo sa pipila ka kanasuran tungod sa ikaduhang gubat sa kalibutan, nakabangon ra gihapon sila ug mibalik sa paglambo. Busa ako nagtoo nga dili magdugay ang krisis nga nasinati karon sa mga hapon mobalik ra gihapon sila sa pagbangon.

Bisan og nagnihit na ang pagkaon sa mga hapon nakahimo pa gihapon sila sa pagpanghatag sa ilang pagkaon sa way paghuna-huna kun may mahabilin pa ba   niini pagka sunod adlaw. Wa usab kita makadungog nga nagreklamo ang mga hapon ngadto sa ilang gobyerno seguro, tungod kay ilang nakita nga mihikotar dayon kini sa ilang mga panginahanglan ug wa sila pasagdi. Kahiusahan ug pagsuporta ngadto sa ilang kagamhanan ang ilang gipakita sa tibook kalibutan.

Kun ugaling ang mga Pinoy makahimo sa disipilina sama sa gipakita sa mga hapon, dili magdugay mahisama usab kita kanila sa pag-asenso. Puwera lang ang linog ug tsunami. Di lang ta mangandoy nga ig-on upod ta niini.