Nag-anam ka lapad ang kagubot ug kaguliyang sa mga nasud sa tunga-tungang sidlakan nga mahimong hinungdan sa pagsaka usab sa prisyo sa mga produkto sa petrolyo.
Di na suliran sa mga negosyante ang pagpangatarungan nga pasakaan ang prisyo sa gasoline, krudo ug uban pang produkto sa petrolyo kay nakasaksi ang katawhan sa kalibotan sa nahimong pabilo niini.
Kun may pagsaka sa prisyo sa maong palitonon sa panahong malinawon ang mga nasud nga nagkupot sa mga tinubdan sa petrolyo, daw unsa pa kaha kun magkagubot kini.
Ang gubat sibil nga maoy nahitabo karon sa nagkadaiyang nasud sa Middle East di hisayran kun kanus-a kutob.
Busa di usab masayran kun kanus-a mokalma ang mga supplier sa gasoline , krudo, ug uban pang mga produkto sa pagpa-aginod sa prisyo sa lana.
Hinuon dinhi sa nasud, ang mga magbabalaod naghunahuna na sa kabug-at sa maong problema nga nasagubang karon sa tanan, di lamang sa mga motorista kundi sa tanang industriya .
Kini tungod sa kagamhanan sa prisyo sa mga produkto sa petrolyo sa dagan sa ekonomiya sa nasud.
Nagtuo ang tanan nga di magmika ang mga magbabalaod sa paghatag og tukmang solusyon aron nga di kaayo masabak sa kabug-at sa maong epekto ang katawhan.
Nasayud ang katawhan nga way makapakgang sa mga supplier sa lana sa mga lakang nila pagpasaka sa prisyo sa ilang mga produkto.
Apan usa sa mahimo sa kagamhanan aron di kaayong mabuktot ang katawhan sa pagpas-an sa maong umento sa prisyo, mao ang pagtikad sa kaugalingong tinubdan sa lana niini didto sa mga isla sa Spratley.
Nasayran sa tanan nga giibid-ibiran sa China ang maong teritoryo sa ilang kahakog nga solohon ang pagpanag-iya sa katibuk-ang lugar nga gibahin-bahin na sa Indonesia, Malaysia, Brunei, Pilipinas.
Kundi tikaron sa kagamhanan sa Pilipinas ang maong tinubdan sa lana sa Spratley, makapahimus kaha kini, di kaha kini mausik lang kay ilogon sa China? Di ba?