Kinsay wala motrabaho?

Human mabutyag nga gatusan ka armas nga gipanag-iya sa kagamhanan sa dakbayan sa Sugbo walay mga lisensya, mangutana kita kun unsay gihimo sa kapolisan niini?

Ang kapolisan kusog kaayong mangronda sa kabalayan nga ang tag-iya naghupot lang og usa o duha ka armas apan gatosan.

Ang nakalahi lang kay kadtong gipangronda sa kapolisan mga ordinaryong tawo ug kining naghupot og daghang armas nga walay lisensya usa ka local government unit.

Alang gud nako, ang mga tagdumala sa kagamhanan maoy angay’ng magsilbi nga ehemplo sa katawhan.

Gibutyag usab sa hepe sa City Hall General Service Office nga gipadagan-dagan gihapon nila ang unom ka bus nga wala marehestro sa Land Transportation Office. Kining maong mga bus pwerteng dugaya na nga gidonar sa laing nasud, apil na sa Japan, apan wala pa gayud maparehestro sa mga opisyal sa City Hall.

Kinsa kaha ang nagpabaya niini? Ayaw mo kasuko ha kay kining ako pagtul-id kini sa hiwi. Kanunay’ng gipasiatab ni Mayor Michael Rama nga usa sa iyang programa mao nga tul-iron ang baliko o hiwi.

Ang padayong paggamit sa mga opisyal ug kawani sa City Hall og armas nga expire na ang lisensya ug ang pagpadagan sa mga sakyanan nga wala marehestro sa LTO maisip nga padayon nila nga gisubay ang hiwi. Dunay popular kaayo nga panultihon nga nagkanayon “Ang buhat maoy pasultiha dili kay ang sulti maoy pabuhaton.”

* * *

Kini bitaw’ng pagtukod og mga illegal structures sama sa mga tindahan diha sa aseras angay’ng tagdon mentras sayo pa.

Nakabantay ko diha sa barangay Labangon kanang karsada Salvador, ang aseras gipangtukoran na og mga tindahan. Angay kini nga tagdon dayon sa City Hall demolition team.

Kun moabut ang higayon nga mapuno na sa mga illegal structure ang aseras ang mga tag-iya niini lisud na papahawaon kay magtoo na man sila nga husto ang ilang gihimo.

Ang aseras gihimo aron anha moagi ang mga tawo nga maglakaw aron dili sila mamilegro nga maligsan, apan kay duna may mga tindahan nga gitukod ang tawo anha na sa karsada.

Atimana ninyo ni taga Squatters Prevention Encroachment Elimination Division (SPEED). Diha pod sa dalan Panganiban, pwerteng gamaya na sa karsada tungod sa mga namaligya og mga surplus nga pyesa sa sakyanan.

* * *

Kaming mga reporters sa City Hall gidasig g’yud ni Mayor Rama pagpakabana pinaagi sa pagbutyag sa mga dili maayo. Apan ang labing maayo nga kun mosaway kita duna usab kita’y sugyot kun unsay angay’ng buhaton.

Nabantayan man gud nako nga dunay uban diha nga kusog lang kaayo nga mosaway pero walay maayong pamaagi unsaon niya nga mapalambo ang usa ka gimbuhaton kun siya ang tugyanan niini.

* * *

Grabeha na g’yud ang pagsaka sa kantidad sa petroleum products sama sa krudo ug gasolina. Resulta, ang mga PUJ operators mohangyo na usab kuno sila og laing usbaw sa pletehan.

Wala mo malipong? Bag-o pa gani kamo gitugotan nga makapausbaw og P1.00 nga usbaw sa pletehan aron mahimo na nga P7.50 ang minimum karon mangayo na usab mo?

Apan nahibaw-an nako nga duna man diay mga drayber sa taxi nga wala ganahi nga gipausbawan ang ilang flagdown rate ngadto sa P40 ug tag P3.50 sa matag 250 metros nga biyahe.

Mga drayber nga gikahinabi nako didto sa car wash shop sa Labangon kagahapon miingon nga kaniadto mga tawo mosakay g’yud og taksi apan karon nabantayan nila nga ang uban mag-antos na lang og jeep.