Magandang panahon

Nang kami’y magising kaninang umaga –

Ako ay naupo sa giid ng kama

Sabay nag-antanda at saka nagwika

Salamat sa Diyos kami ay buhay pa!

Nang kami’y sumulyap sa labas ng bahay

Sa ami’y bumati liwanag ng araw;

Sa munting bintana nang kami’y sumungaw

Magandang panahon ang aming natanaw!

Di ito katulad ng araw kahapon –

Madilim ang langit saka umaambon;

Malakas ang ihip ng hangin maghapon

Ang mga halaman ay basa ang dahon!

At saka kahapon parang nagluluksa

Inang kalikasan parang lumuluha;

Dahil sa pumanaw ang isang nilikha

Kanegosyong tapat ng aming binata!

Pagyao ng best friend halos nakasabay

Ng dito’y paglisan ng isang heneral;

Dalwang kamatayan bagama’t hiwalay –

Parang dinamdam din nitong kalikasan!

At ngayong maganda ayos ng panahon

Anak kong nag-abroad dumating na ngayon

Kaya tuwa namin sa puso’y kumandong

Pagka’t nakauwi anak kong marunong!

At ngayong umaga anak ko’y tumawag

Sa sinakyang airplane nakababa na raw;

Tuloy sa Makati sa kanyang tanggapan

Bukas na uuwi sa aming tahanan!

Kaya ang puso ko’t ng aking pamilya

Sa ganda ng araw kami ay masaya;

Dumating kong anak wala nang kasama

Sasabihan naming dito na lang siya!

Sisikapin naming siya’y kumbinsihin –

Mga kanegosyo dito na kontakin;

Dito na maglagi – malapit sa amin

Kalusugan niya’y alaga pa namin!