Nagsugod na og dawat sa $1,000 matag usa ang mga human rights victims sa kanhi diktadoriya ni anhing Ferdinand Marcos ug sa iyang pamilya.
Simbolo sa pagkamadaugon ang pagpang-apod-apod sa maong bayad. Apan alang sa mga Marcos, ilabi na ni Kongresista Imelda Marcos nga asawa sa diktador, nga wala unta silay angay bayran kay wala kunoy nahitabong abuso sa panahon nga sila pa ang nagpug-ok sa gahum ning nasud.
Tigulang naman unta kini si Imelda, apan nganong hangtod karon wala gihapon siya makat-on sa pag-angkon sa ilang mga kasal-anan sa mga Pilipino sulod sa hapit 20 ka tuig nga anaa sa gahum ang iyang bana.
Tama na! Matud pa ni anhing Cory Aquino. Palitan na!
Karon, maayong ingnon si Imelda, sakto na! Sakto na sa pagpaka-aron-ingnon.
Ako’y gikuyawan karon sa mga bag-ong tubo nga wala na makaila kinsa si Ferdinand Marcos, unsa siya nga klaseng lider kaniadto, unsay iyang mga human rights violation, ug giunsa siya sa pagpalagpot sa katawhang Pilipino didto sa EDSA niadtong 1986.
Kun ingon niini ang ka-ignorante sa kabatan-onan karon, masayon lamang alang sa mga batan-ong Marcos ang pagpa-buhi sa gibaton nilang kaligutgot sa mga Pilipino nga makausa naghiusa pagpapahawa nila sa Malacañang.
* * *
Gawasnon na ang Norwegian national nga si Sven Erik Berger ug pangasaw-onon nga si Karen Esdrelon human gibasura sa Cebu Provincial Prosecutor’s Office ang kasong special complex crime nga kidnapping with homicide.
Apan ang kaulaw ug kalaay sa 16 ka adlaw niyang pagpuyo sulod sa Cebu Provincial Police Office dili sayon kabayran og salapi.
Mas gipili hinuon ni Berger ug Esdrelon nga magpakahilom na lang human sa maong insidente, bisan sa kadaot nga ilang naangkon tungod sa binulay-og nga imbestigasyon sa mga polis nga gipanguluhan ni CPPO director Erson Digal. (Ang maong hitabo leksiyon hinuon ni Digal nga laog kaayo og media mileage).
Si Berger mianhi sa Sugbo aron sa pagpangasawa og usa ka Pilipina, usa pa gyud ka Cebuana nga taga Tuburan, konstituwente sa tubong-pobre nga si Mayor Aljun Diamante.
Dako na unta kaayong butang alang kanatong mga Sugboanon nga makadungog og usa ka langyaw nga motuyo og anhi aron sa pagkuha sa iyang pangasaw-onon nga atong silingan.
Apan inay hatagan nato si Berger sa atong pagka-maabi-abihon, napulihan kini og mga sayop nga tulisok pagpatubag kaniya sa salaod nga wala niya mahimo.
Kining maong dakong kadaot mahimong ipatubag kanato ni Berger; usa kini ka damyos nga mahimo niyang ipaningil sa mga polis nga wala magtuman sa ilang tahas pagpangita og saktong ebidensiya aron iduot ang usa ka tawo sa usa ka krimen.
Apan naghari sa galamhan ni Berger ang iyang pagka-Norwegian. Kining mga Norwegian may pagka-manggiluy-on, kamao motan-aw og nag-antos ug kamao motabang sa nag-antos. Anaa kanila ang pagkamahigugmaon sa kalinaw, dili mga burukinto ug may pamatasan.
Ang mga Norwegian mga adunahan tungod kay ang ilang gobyerno sa Norway nagsuportar kanila sukad sa ilang pagtungha sa elementarya, ug mga serbisyo alang sa katawhan hapit tanan libre. Apan bisan sa ilang ka-adunahan, anaa kanila ang pagkakugihan, motrabaho aron makatigom.
Giasoy ko kining profile sa mga Norwegian tungod kay sa sinugdanan, makatabang unta sa kapolisan sa pag-ila kun “probable” nga si Berger nalambigit sa pagdagit ug kamatayon ni Ellah Joy Pique.
Apan karon nga gusto na ni Berger nga magpakahilom, moapil na lang ko sa pag-awhag sa mga tawong kunohay nagtabang-tabang sa pamilyang Pique sa paghunong na sa ilusyon ug pagpugos pagduot sa Norwegian ug kang Esdrelon.
Respetohan nato ang resolusyon sa Provincial Prosecutor’s Office nga matud pa dili mobarog ang “positive identification” sa mga bata kun wala kini mga corroborating evidences ug testimonies. Kay pananglit nasayop lang ang mga bata, unsa man ang isuporta sa ilang pag-identify kang Esdrelon ug kang Berger?
Wala na. Kay wala man gyud makit-i kadtong SUV o Pajero nga giingong gisakyan sa nanagit nga makasuporta unta sa kaso.
Usa pa, nasuta naman sa piskaliya sa probinsiya nga tinuod ang alibi sa duha, sumala pa sa nakuhang mga CCTV grab sa Waterfront Hotel nga didto gyud sila pasado alas 4 sa adlaw gidagit si Ellah Joy.
Adunay miingon nga sayon ra kaayo daganon ang Waterfront Hotel paingon sa Calajo-an, Minglanilla, busa posible kuno nga gikan sa Waterfront Hotel dali nga nagpadagan si Berger ug Esdrelon paingon sa Cala-joan kay makuha ra kuno og 15 ngadto sa 20 minutos ang dagan sa sakyanan agi sa South Road Properties.
Nayabag na! Ako nga duha na ka tuig nga nagpuyo sa Minglanilla, maglisod ko og kuha nianang 20 minutos nga dagan sa akong sakyanan gikan sa Upper Pakigne paingon sa The Freeman office sa Manalili nga anaa ra mahimutang unahan gamay sa baba paingon sa SRP.
Aw, makuha man og 20 minutos gikan sa Waterfront paingon sa Calajo-an, Minglanilla basta ang dagan sa sakyanan 100 ngadto sa 120 kilometros matag oras, unya kurbada ug liko 100-120 lang gihapon, bisan sa mga junction nga stop pa ang signal, deretso-deretso lang ka, kun dunay mag-ali nga sakyanan ug molabang nga tawo imo lang banggaan.
Kanang mga imposibleng mga argumento hinaot hunongon na, aron dili kita makadugang sa kadaot sa tawong nabundakan na og kadaot tungod sa nagyagaw nga imbestigasyon sa kapolisan.
Ang labing maayo, sugdan og balik ang imbestigasyon ug pangitaon ang tinuod nga mga criminal.