Maayo tingaleng susihon sa Office of the President ang Cebu Port Authority (CPA) aron matino hain mapunta ang milyones nga kita niini sa operasyon sa mga pier sa lalawigan sa Sugbo.
Unang kaso nga angay ukbon sa Malacañang mao ang koleksiyon sa CPA diha sa Cebu International Port (CIP) aron mahibaw-an hain mapunta ang milyones pesos nga abang sa OPASCOR ug ang abang sa mga pribadong mga ship owners nga nag-abang og mga dunggoanan sa dili mominos pito ka mga pier sa siyudad sa Sugbo ug sa Mandaue.
Maayong mahibaw-an sa pamunoan ni Pres. Benigno Simeon Aquino III kun wala ba mapunta sa mga kurakot nga opisyal sa CPA ang kita sa maong buhatan nga mapunta unta ngadto sa panudlanan sa gobyerno.
Laing kasong maayong tan-awon sa Office of the President mao ang hinungdan nganong tuyo nga giligoyligoy ang pagpaningil sa P14.6 milyones nga abang sa Sangi Port sa Toledo sa usa ka fertilizer company sa maong siyudad.
Ang akong gikahadlokan niini mao nga nahuman na og bayad ang maong fertilizer company sa Toledo apan wala lamang kita masayod asa mapunta ang maong salapi.
Kining CPA usa kini sa mga government-owned and controlled corporation nga ania dinhi sa Sugbo. Mosapi kini og milyones gikan sa mga abang sa mga dunggoanan sa tibuok lalawigan ug dinha nianang CIP.
Bulahan kaayo ang mga empleyado niining CPA tungod sa kadagko sa ilang mga benepisyo.
Gani, ang Commission on Audit (COA) mismo ang mimando sa mga opisyal ug mga empleyado sa CPA sa pag-refund sa milyones pesos nilang gibayad sa ilang health insurance nga Medicard.
Ambot og nag-agi pa og pagtuon sa mga abogado sa CPA kining pagpanghatag nila og health insurance ngadto sa mga empleyado ug opisyal nga libre, nga wala unta kini itugot sa ubang mga ahensiya ug mga GOCCs.
Kampante tingale ang mga opisyal ug mga empleyado sa CPA nga magdugay kadtong kurakot nga pamunoan ni Gloria Arroyo mao nga release taman sa ginhawa sila alang sa kaugalingon nilang mga benepisyo. Salamat na lang ni Pres. Benigno Simeon Aquino III nga usa sa iyang kampanya mao ang paglimpyo sa mga GOCCs nga migara og pagpadako sa ilang mga benepisyo nga wala na masubay sa standard ug sa balaod.
Kining kaso sa CPA maayong panaminan sa ubang mga GOCCs. Ang Mactan Cebu International Airport (MCIA) nakatilaw naman sa dihang gimandoan sila nga ipa-refund ang P500 mil nga “pabaon” ni kanhi Department of Tourism regional director Dawnie Roa.
* * *
Nagtuo ko nga hasta na gyud ang mga sakop sa atong Philippine National Police (PNP) nagduda na sa gikusgon sa ilang mga ebidensiya batok kang Sven Erik Berger ug sa uyab niining Cebuana nga si Karen Esdrelon.
Nganong nagtukod man sila og laing task force?
Gawas sa pagtukod og laing task force minus ni kanhi Cebu Provincial Police director Erson Digal, nagpunay na karon og gukod ang kapolisan sa laing tawo nga ilang gidudahan nga maoy tinuod nga suspetsado sa pagdagit ug pagpatay kang Ellah Joy Pique nga taga Calajo-an, Minglanilla.
Hatagan na lang nato og higayon ang kapolisan sa pagtul-id sa ilang imbestigasyon sa kamatayon ni Ellah Joy aron mahatag gayod ang tinuod nga hustisya, dili hilaw nga hustisya.
Nalipay lang hinuon ko nga wala na nila ipamugos ang ilang pagduot kang Berger ug Esdrelon ug milili na sila og hinayhinay sa ubang posibilidad, mentras tanto aduna pay gamay’ng higayon pagtino kinsa gyud ang responsable sa kamatayon sa 6-anyos nga bata.
Apan gikuyawan pa gihapon ko nga usa o duha sa mga kriminal ang naka-ikyas ug wala na dinhi sa Sugbo.
Apan sige lang, kun adunay usa nga nahibilin dinhi, mahimo man kining gamiton aron magukod ang mga kaubanan. Kini kun mahibaw-an na sa umaabot nga dili gyud kanang Norwegian ug ang nurse nga taga Tuburan ang responsable sa kamatayon ni Pique.
* * *
Gikahadlok sa Estados Unidos karon ang mga kagubot sa Middle East. Gipangandaman karon sa US ang umaabot nga piniliay sa Egypt ug seguradohon niining dili mahatag ngadto sa mga radical Muslim groups ang liderato sa maong nasud.
Kay kun mahitabo kini, mahimo nang kaaway sa US ang Egypt.
Ug makaluluoy ang mga silingang nasud sa Egypt nga alyado sa US, sama sa Israel. Ang Libya karon maoy sunod nga nahimong concern sa US. Ang masupilon nga Moamer Kadhafi mipakusog sa mga pro-government protesters ug gani mipahibalo siyang andam siyang mohatag og mga armas kanila aron isakbang sa mga anti-government protesters.
Nahitabo kini bisan paman og ang United Nations mihatag na og silot kang Kadhafi, apil na ang pag-freeze sa iyang mga assets ug gidid-an na sa pagbiyahe.
Ang UN mimando usab sa pagsugod sa imbestigasyon batok kang Kadhafi kalabot sa giingong mga crimes against humanity nga nahimo niini sa nagpadayong halapad ug gubot nga protesta batok sa iyang pamunoan.
Kagahapon, si US President Barack Obama mismo ang miingon: “Kadhafi must go now!” Apan ambot lang og maminaw ba kaniya si Kadhafi.
Gawas sa Egypt ug Libya, ang Yemen gubot lang gihapon kaayo, apan dili sama kang Kadhafi, ang presidente dinhi bugnaw nga nagsulbad sa krisis sa iyang nasud.
Ang angay paabuton dinhi sa Asya ang protesta sa China aron undangon na ang dugay nang katuigan nga pagdumala sa mga komunista ug pagpatuman sa one-party rule ug pagpug-ok sa demokrasya sa mga Insik. Ang panawagan og protesta sa China gipaagi lang sa internet, nga milyon-milyon nang mga Insik ang nakabasa.