Abusadong piskal
Sa ika-tulong higayon sulod lang sa upat ka buwan ang assistant city prosecutor sa Mandaue nga si Bienvinido Mabanto gipasanginlan na sab nga nanagmal og drayber tungod sa aksidente sa trapiko.
Ang insidente nahitabo niadtong Biyernes sa hapon didto sa parking area sa Park Mall diha sa North Reclamation Area. Usa ka Darwin Dabon, drayber sa usa ka delivery van, aksidente nga nakabag-id sa giparada nga sakyanan sa piskal samtang siya miparking sa iyang gimaneho nga van.
Dili dako ang danyos sa sakyanan ni Mabanto ug andam ang kompaniya nga maoy nanag-iya sa gimaneho ni Dabon nga van pagbayad sa danyos. Dali sab nga nangayo og pasaylo si Dabon ngadto sa piskal human sa hitabo.
Apan patid maoy nahiaguman ni Dabon gikan ni Mabanto sigun pa sa mga saksi nga gikutlo sa report. Wala pa matagbaw gipabilanggo niya ang drayber didto sa Subangdaku Police Station.
Dili ni unang higayon nga gipasanginlan si Mabanto og pagpanagmal. Niadtong Nobiyembre sa miaging tuig usa ka drayber og bus ang mireklamo nga iyang gisagpa tungod gihapon sa trapiko.
Samtang niadtong Disyembre usa ka Japanese national ang iya sab nga gipabilanggo ug matud pa gikulata. Nisibog hinuon ang Hapon sa iyang pasangil ug mao pay nangayo og pasaylo ngadto ni Mabanto.
Ambot giunsa ni Mabanto ang Hapon nga kalit man nga miatras sa iyang pasangil ug nangayo pa og pasaylo. Pero sa gidaghanon na sa mga pasangil batok niya tataw na ang iyang pagkaborukinto.
Nasayod ko nga dili malikayan ang mga aksidente sa trapiko, apan sa kadaghang opisyal sa gobyerno nga nagmaneho sab og sakyanan, wala man ta makadungog nga sila nanagmal ug mipapriso sa mga drayber nga nakahimo og sayop sama sa gihimo ni Mabanto.
Kini nagpakita lang sa iyang kamapahimuslanon sa iyang gahom ug pagkaabusado. Nganong abusado? Tungod kay wala kinahanglana nga iyang ipabilanggo ang drayber nga nakabag-id sa iyang sakyanan.
Piskal siya busa dili na kinahanglan nga tudloan siya unsay hustong lagda gawas lang kun siya ignorante sa balaud. Nagmaneho sab ko og sakyanan, dili kalikayan ang panagbangga diha sa karsada, apan kun yano lang nga kaso sa bangga nga way kinabuhi nga nakalas o ba kaha naangol dili kinahanglan nga imong ipapriso ang drayber bisan siya pa maoy dunay sayop.
Ang normal nga proseso mao nga kuhaan sa iyang lisensiya ang drayber ug pabayron sa danyos. Dili gani kinahanglang ang drayber mismo maoy mobayad kay duna may insurance ang mga sakyanan.
Pero ang gihimo ni Mabanto gipapriso ang kabus nga drayber. Ang mga ignorante pud nga polis sa Mandaue misunod sa mando sa piskal bisan way igo nga basihanan. Mangutana ko nimo piskal Mabanto legal ba ang imong pagpapriso sa drayber kun ang imong gibasihan mao lang ang pagbangga niini sa imong sakyanan?
Gawas lang og imong butang-butangan ang drayber nga misukol nimo.
* * *
- Latest
- Trending
