EDITORYAL - Ang pangandoy sa Pinoy

Ang mga Pilipino wa gyuy laing pangandoy, kundi makapanarbaho didto sa gawas sa nasud tungod kay wa nay paglaum nga moumento pa ang ilang kinabuhi dinhi sa ato.

Ang mga ginikanan, maningkamot nga makalampos sa pagpatuon sa ilang anak, pagpakuha og kurso sa mga anak sa taas nga paglaum nga adto makatrabaho sa ubang nasud sa gawas.

Gawas nga makatrabaho didto, pangandoy sa kadaghanan nga makabana o kaha makaasawa og taga gawas aron makapuyo og haruhay nga pagpuyo.

Lahi sa taga gawas nga way tuyo nga mopuyo dinhi sa Pilipinas aron manarbaho, kundi anhi maglipay-lipay uban sa Pinay nilang asawa.

Kining kahimtanga, mao ni ang atong masaksihan nga uso karon, ug nagtuo ta nga sa umaabot nga mga katuigan mosamot pa ang paningkamot sa mga Pilipino nga mag-overseas foreign worker (OFW).

Karon 90 milyones pa ang atong populasyon ug daghan pang mga nasud ang nagkinahanglan og mga trabahanteng Pilipino, mababaye ug lalaki tungod kay kadaghanan sa mga Pilipino, kugihan kaayo.

Samtang nagdaghan ang populasyon sa nasud, padayon usab ang pagkaut-ot sa ekonomiya tungod kay walay higpit kaayong pamaagi ang kagamhanan aron di mahunlak ngadto sa mga bulsa sa mga kiriwang opisyal sa gobyerno ang kuwarta niini.

Ang pait kaayong palandungon kun wala nay mga nasud nga manawat og mga langyaw nga trabahante kay hasta usab sila naglisod na sa ilang ekonomiya. Asa nalang kaha intawon paingon ang mga Pilipino.

 Ambot oy sa panahon pa ni kanhi Presidente Marcos, siya ra may sikat kaayong gipasanginlang nanghilabot sa kuwarta sa gobyerno.

May mga opisyal kaniadto sa obras publikas nga namatud-ang nangawkaw sa kuwarta sa gobyerno, nangadugta gyud tinuod didto sa prisohan kay wa gyud pasayloa ni Marcos.

Gipalagpot si Marcos pinaagi sa people power sa pagtuo nga wala nay mosikat nga kawatan sa kuwarta sa kagamhanan, apan oy, naunsa bang gikan sa usa nga si Marcos, midaghan naman hinuon kaayo karon ug gani wa na ilhi kun si kinsa pa ang ubang nakabulsa og minilyon ka pesos nga kuwarta gikan sa panudlanan sa kagamhanan. Di ba?